National Rural Drinking Water & Sanitation Week 2015 hawn a ni

Nimin khan Aizawl leh district khawpui dangah PHE hnuai­a Communication & Capacity Development Unit buatsaihin National Rural Drinking Water & Sanitation Week 2015 hawnna inkhawm neih a ni a; Aizawlah chuan Vanapa hall-ah Environment & Forest minister Lalrinmawia Ralte-in a hawng.

Week hawnna inkhawm hi PHE secretary Lianchungnunga'n a kaihruai a; E&F minister Lal­rinmawia Ralte chuan, tui chu Pathianin nunna chi hrang hrang din nan a siam a ni tih sawiin, humhalh leh a thianghlim zawk­na tura ṭan lak a ṭul thu a sawi.

Lalrinmawia Ralte chuan, Aizawl khawpui langsar laite a fai ngaihtuahin, dáia luite chu a ṭawp hle tih a sawi a, "Tun ṭuma hmalakna tur hian thingtlang mite a bitum deuh dawn a, khawpui mite hi thingtlang mite entawn tura hma kan lak a ngai a ni. Tui tel loin kan awm thei lo a, lui tui siamtu lui hnára ramngawte kan tichhe nasa lutuk a, buaina kan tawk mek zel a ni," a ti.

E&F minister chuan, Mizoramah khaw fai lawmman dawngtu khua 89 an awm tawh tih sawiin, faina chu nun­phunga tuh a ngaih thu a sawi a; tui thiang­hlim pawimawhna mipuite'n an hriat zel theih nan 'National Rural Drinking Water & Sanitation Week duan a nih thu sawiin, "Khaw hrang hrangah Village Health & Sanitation Committee din a ni tawh a, thiang­hlimna leh tui thianghlim ṭangkai leh hmasawn phah nana kan hman ngei ka beisei," a ti.

Khualzahawm, parliamentary secretary (PHE) Hmingdailova Khiangte pawhin thu sawiin, thingtlangah tui thianghlim in tur an neih theihna tur te, zunram thiar kawnga mipuite'n hma an sawn theih nan sorkarin ruahmanna a siam tih a sawi a; tui hnár humhalh ṭha turin mi tinte a chah.

Week hi March 22, 2015 thleng awh tur a ni a; a hawnnaah hian tui thianghlim nei tur leh faina lama theihtawp chhuaha mi dangte kawhhmuhtu ni turin thutiam an sawi rual a ni. 'Sanitation hi kan ngai pawimawh tawk a ni' tih thupui hmangin Hrangbana College leh Aizawl West College zirlaite'n debate an nei.