MNF-in ni lungchhiatthlakah ngai

MNF president Zoramthanga chuan, Mizo­rama zu zawrh chu Pa­thian duh dan a nih a rin loh thu a sawi a, dan hnuai­a zu zawrh ṭan ni, March 16, 2015 chu Mizo­te tan ni lungchhiatthlak taka an ngaih thu a sawi.

Zoramthanga hian nimin khan Mizo Hnam Runa inkhawmah thu a sawi a, "Zu zawrh hi tlawmngai pawl leh kohhrante duh loh a nih avangin, anni beráwn lo chuan MNF chu a kal ve lo ang. Zu hi kan do rêm thei lo a nih pawhin, suahsualna tipunluntu a nih vangin thlah zalen kan duh ve lo. Duhthusamin do hneh lo pawh ni ila, a tlanchhe zawkah kan ṭang lo ang," a ti.

Naupang tê têa thi an pung nasa nia sawiin, MNF president chuan ruihhlo vanga an ngaih thu a sawi a; nasa zawka ruihhlo do an tum thu sawiin, "March 16, 2015 hi Zoram tan chhiatna ní a ni," a ti.

MNF general secretary Lalruatkima, MLA pawhin thu sawiin, Congress sorkarin MPSC chairman atana Andrew Lalherliana ruat a nih dan chu a felhlela an hriat thu leh, member atana pastor/reverend ruat an tum chu ṭha lo an tih thu a sawi a, "MPSC member ni tura an sawmnate pastor/reverend ṭhenkhatin mawihnái taka an lo hnar hi sakhaw puithiamte tiha mawi tak a ni," a ti.

Hetih lai hian, MNF ṭhalaite chuan nimin khan an party office-ah zu zawrh duh lohna an lantir a; a remchan dan anga la dodal zel an tum thu an puang a ni.