Gas consumer 41.88%-in DBTL zawm tawh

Supply minister John Rotluangliana hoin nimin khan IPR directorate conference hall-ah Direct Benefit Transfer of LPG (DBTL) chungchang sawiho a ni a; DBTL scheme chu Mizoramah 41.88%-in an zawm tawh thu tarlan a ni.

National Payment Corporation of India (NPCI)-ah Mizoram Rural Bank leh Mizoram Cooperative Apex Bank-te an la inziah luh loh vanga mipuite harsatna awm chu tihfel a ni tawh tih sawiin, Supply Minister chuan, "MCAB hian March 13, 2015 khan registration an nei tawh a, vawiin lam hian IOC-ah an lehkhate an thehlut dawn a, hei hian chak lehzualin DBTL scheme chu kan kalpui theih a rinawm a ni," a ti.

John Rotluangliana chuan, DBTL hnuaia gas consumer-te inziah luhna hun grace period chu March 31, 2015-ah a tawp dawn tih sawiin, mipuite chu DBTL ngai pawimawh a, huntiam ral hma ngeia inziak lut turin a ngen a ni.

Meeting-a tel gas agent-te chuan application pending an nei lo nia sawiin, "Application kan hmuhte chu system-ah consumer-te bank account a fel chuan an thun nghal zel a ni a, inziak lut an tlem chhan chu mipui lam aṭangin form a lut chak lo a nih a rinawm," an ti a; bank account number 11 (SBI leh MRB) leh number 15 (Apex Bank)-te ziak dik turin mipuite an ngen.

Meeting-a tarlan danin, gas connection transfer leh hming thlakna chungchangah chhungkaw zinga mi, subscriber a boralin a chhungkaw zinga mi tu pawhin a hminga a thlakin fee chawi a awm lo a, mahse, hemi atan hian death certificate leh self declaration form a ngai thung. Chhungkaw member ni lo, mi dang hnen aṭanga lei, hming thlakah erawh chuan security deposit chawi belh tur a awm a ni.

DCSO hrang hrangte weekly report-a a lan danin, DBTL scheme zawm tawh chu consumer 1,07,564 an ni a, Mizorama LPG consumer awm zawng zawng 2,56,803 aṭanga chhûtin 41.88% an ni.