Assembly Budget Session tan a ni Sorkar pawisa hmuh a pung - Governor

Mizoram Assembly pasarihnaa session vawi ngana chu nimin chawhma dar 10:30 khan Assembly House-ah ṭan a ni. Session-ah hian Mizoram Governor Dr Aziz Qureshi chuan thu sawiin, Congress sorkar hnuaiah kawng hrang hrang aṭanga chhiah lak luh a pun thu a sawi.

Assembly session ṭan a nih velah Governor hian thu a sawi nghal a, sorkar hmalakna hrang hrang a tarlang. Governor sawi danin, kumin sorkar kum kal mekah January 2015 thleng khan property registration aṭangin cheng nuai 243.43 leh building tax aṭangin nuai 470.22 hmuh a ni a, February, 2015 thlengin lottery aṭangin cheng nuai 629.98 leh small saving schemes aṭangin nuai 629.98 hmuh a ni.
Sorkar kum kal lai vekah February, 2015 thleng khan Taxation department-in cheng nuai 20,287.61, Transport department-in nuai 1747.24, Trade & Commerce department-in nuai 147 leh Excise & Narcotics department-in nuai 257.14 an thawk chhuak bawk.
Dr Aziz Qureshi chuan, kawng awm sa chei ṭhat leh kawng thar siam sorkarin a ngai pawimawh tih sawiin, "PWD-in kawng laih thar hna km. 19.55, blacktopping km. 71.538, culvert 98 leh lei pakhat an siam tawh a ni," a ti a; building pawh kawng hrang hrang atana hman turin 37 sak a nih tawh thu a sawi.
Miretheite dinhmun chawikan chu sorkar ngaih pawimawh berte zinga pakhat a nih thu sawiin, Dr Aziz Qureshi chuan, "Sorkarin miretheite chenna turin Chite, Lawipu, Rangvamual leh Durtlangah in a sa mek a, heng hmunahte hian in 1096 awm thei tura ruahman niin, thla rei lote chhungin zawh fel theih beisei a ni," a ti.
Governor sawi danin, sor­karin Computerisation of Ration Card a buaipui mek a, 93.58% zawhfel a ni tawh. Zawh a nih chuan ration card chuang liam awm ṭhin a sutkian beisei a ni.
Dr Aziz Qureshi chuan dan leh thupek kenkawhtute fakin, "Police-te hi pawisa lem man chungchangah te, ralthuam tawlhrûk man chungchangahte leh ruihhlo chi hrang hrang man chungchangahte an fakawm hle," a ti.
Mizoram sorkarin corrup­tion a zung nena phoro ngei a tum tih sawiin Dr Aziz Qure­shi chuan, "Corruption phoro hi good governance a awm theihna atana sorkar hmalakna pawimawh tak pakhat a ni," a ti a; corruption dona atan Lokayukta Bill, 2014 chu Mizoram Legislative Assembly-ah pass a nih tawh thu a sawi.
Governor thusawi zawhah INC member Vanlalawmpuii Chawngthu-in Larsap thusawia lawmthu sawina Motion of Thanks a pu lut a, inkhawm tihtawp nghal a ni. Motions of Thanks hi vawiinah sawiho a ni ang.