Vanglaini logo

MPSC member atan Rev Zosangliana sawm Synod-in a chawlh dilna a pawm

Mizoram Presbyterian Kohhrana minister thawk lai, Rev. Zosangliana Colney chu Mizoram sorkarin Mizoram Public Service Commission (MPSC) member turin a sáwm. Sawmna hi Rev. Zosangliana Colney pawhin pawmin, Synod-ah voluntary retirement a dil a, Synod Officers' Meeting (OM)-in a phalsak tawh bawk.

Vanglaini palai zawhna chhangin Rev. Zosangliana Colney chuan, MPSC mem­ber-ah sorkarin pastor/reverend hrim hrim dah a tum thu leh a tìrah a hming a rîk loh thu a sawi a, "Sawm­na ka pawm chhante chu, MPSC member-ah pastor dah an tum vang leh, MPSC-a awm tura Synod-in min phalsak vang a ni," a ti.

Rev. Zosangliana Colney sawi danin, MPSC member tur hian a tirah chuan pastor pension tawh Rev.Dr Van­lalchhuanawma sawm a ni a, Synod pastor pension kum hi kum 62 ni tawhin MPSC-ah kum 62 aia upa awm theih a ni si lo a, hemi hnu hian amah chu sorkar hotute'n an sáwm leh ta a ni.

Sorkar aṭanga sawmna a dawn hnuah Synod OM-ah a thlen tih sawiin, "Synod-a thawk chungin MPSC member nih a rem loh avangin, Synod hruaitute thuràwn angin chawlh ka dil ta a ni," a ti a; March 2, 2015-ah voluntary retirement-a chawlh dilna a thehlut a ni.

Synod senior execu­tive secretary Rev. Lalzui­thanga'n Vanglaini palai zawhna chhanga a sawi dan­in, Rev. Zosangliana Colney hi Synod OM-in a chhuah a phalsak a, March 31, 2015 thleng a la thawk chhunzawm ang a, April 1, 2015 aṭangin voluntary retirement-in a chhuak ang.

Zawhna chhangin Rev. Zosangliana Colney chuan, "Sorkar lamin MPSC member-ah hian pastor dah an tum hrim hrim a, ka chungah a tla ta a ni mai a, Pathianin kawng danga a rawngbawl tura min kohnaah ka ngai," a ti.

Politics a ngaihtuah loh thu leh party ṭan lam a neih loh thu sawiin, "An uipa ni zui turah ka inngai lo. Rawngbawlna tho a ni a, MPSC-ah ka awm a nih pawhin dik takin ka ti ang. Pathian rawngbawlna ka chawlhsan dawn tihna a ni lo a, kohhran kalsanin sorkarah ka intu lut tihna a ni lo," a ti bawk.

Rev. Zosangliana Col­ney hian tunah Synod Mul­tipurpose Training Centre-ah programme director hna a chelh mek a, Synod exe­cutive secretary term hnih lo chelh tawh a ni. Thiamna lamah M.A (political science) leh MTh a ni a; MPSC mem­ber-ah ruat a nih chuan, kum li chuang a awm thei dawn a ni.