KHAWTHLIR

Custom Station hawng dawn hnai
Commerce & Industries minister Nirmala Sitharaman chuan, March 25, 2015-ah Zokhawthar hmuna Land Custom Station a hawng a dawn a; hei hi nimin khan chief secretary Lalmalsawma Pachuau hoin sorkar mi pawimawhte'n an sawiho.

Audit training
Rural Development department chuan nimin khan Aizawla IPR conference hall-ah ni thum awh tur MGNREGS leh IAY-a social audit neih dan tur zirna an buatsaih a; Aizawl, Mamit, Kolasib leh Serchhip aṭangin district resource person (DRP) mi 28 an tel. Training zawhah DPR-te hian khaw thlan bik 28-ah social audit an nei nghal dawn a ni.

In kâng
Nimin chhun dar 12:15 khan Saiha Council Venga police station bula police musical instrument dahna in a kang a, bungrua chuh hman lohin a kâng ral. Kângmei hi bawlhlawh hâlna aṭanga kâng kai a nih rin a ni a, rimawi hmanrua Rs. 3,50,000 vel hû a kâng ral.

Consumers Day
Nimin khan Lawng­tlai Bazara Areopagi-ah World Consumer Rights Day hman a ni a, Lawngtlai additional DC R Lalsangluaia'n a hmanpui. World Consumer Rights Day hi March 15 a ni a, Pathian­ni a nih avangin nimin khan an hmang a ni.

Zu rui 131 man
Excise & Narcotics department chuan February thla chhung khan zu rui 131, zu zuar 122, rakzu litres 3045.815, sap zu (um puitling) 5,935 leh zu kaihhnawiah lirthei pariat an man.

MJA Library pe
MJA Public Library-a dah turin Vanpeka'n a lehkhabu buatsaih, 'Ta­han khaw din lungphun souvenir'; Mizoram Cancer Care Foundation-in an lehkhabu buatsaih 'Lungngaihna piaha malsawmna' tih bu thum; V Lalchhuana'n a lehkhabu ziah 'Autonomy Movement in Mizoram' tih bu hnih; B Lalhriatrenga'n a lehkhabu ziah 'Ka Zalenna' tih copy thum an pe. Lehkabu petute chhungah MJA chuan lawmthu a sawi.