Social Welfare dept-in chawimawina hlan

Social Welfare department chuan nimin khan an directorate conference hall-ah R Thansiami, Durtlang hnenah Rajya Mahila Samman 2015 leh K Pari, Saiha hnenah Zila Mahila Samman 2015 an hlan.

Chawimawina inkhawm hmanpuitu, Social Welfare minister PC Lalthanliana chuan, award pahnih­te chu sorkar laipuiin hmeichhia­te chawikân zelna atana kumin aṭanga a siam a nih thu a sawi a, "Award hi kum tin pek tur a ni a, a tum ber chu - hmeichhiate chawikanna leh hmasawnna kawng a hnathawk ṭha, hmeichhe fel leh mi dangte tana inpete hnathawh hriatpui leh chawimawi a ni," a ti.

Social Welfare Minister chuan, ram hmasawnna tak tak thleng tur chuan hmeichhiate an pawimawh tih sawiin, "Hmeichhiate an changkang hmasak phawt loh chuan chhungkua leh ramin hma a sawn thei tak tak lo," a ti a; hmeichhiate chu zirnaah te, hriselna kawngah te, sumdawnna kawngahte leh ram rorelna lamahte ṭan la turin a fuih.

Thansiami hi assistant nursing superintendent-a pension a ni a, nurse hna a thawh lai, rambuai laiin nunau, naupai leh mi harsate tan hna a thawk ṭhin. Kum 2009 khan ram puma nurse-te tana chawimawina sang ber Florence Nightingale National Award a dawng a ni.

K Pari hian Mara hmeichhiate tan kawng hrang hrangah hna a thawk a, an dinhmun chawikan theihna turin a thawkrim hle.

Rajya Mahila Samman hian thuchei bakah Rs. 40,000 a keng a, Zila Mahila Samman hian thuchei leh Rs. 20,000 a keng thung.