PHE Dept leh YMA buatsaihin Serchhipah sanitation Week hmang

PHE department leh Serchhip sub-headquarters YMA chuan nimin khan Serchhip Hmarveng YMA Hall-ah National Drinking Water & Sanitation Week, 2015 hawnna inkhawm an hmang a, Sub-Hqrs. YMA president RL Chhuanawma'n a hawng.

RL Chhuanawma chuan, tui hna humhalh pawimawhzia chu YMA member zawng zawngin hriain, a humhalh leh tihpun kawng­ah an awmna hmun ṭheuhah ṭan la se a duh thu a sawi.

Thusawitu dang Serchhip DC Juhi Mukherjee chuan tui thianghlim pawimawhzia sawiin, "Khawvel hmun thuma ṭhena hmun hnih hi tui a ni a, chutah tui thianghlim kan tih hi chu heng zinga uihûm zat lek a ni. Tui thianghlim hi hriselna atana kan mamawh pawimawh ber pakhat a nih si avangin humhalh kawngah ṭan kan lak nasat a ngai a ni," a ti.

Drinking Water & Sanitation Week hawnnaah hian MUP, MHIP leh MJA aiawh ten 'Tui hna humhalh leh Faina Chungchanga Mitin Mawhphurhna' tih thupuia hmangin panel dicussion an nei.