PHE pipe puakin in pahnih tichhia

Nimin tlai dar 5:10 khan Lawipu-ah Greater Aizawl Water Supply Scheme (GAWSS) phase-I pipe lian a puak a, chenna in pahnih a tichhia.

Lawipu YMA hruaitute hnen aṭanga thu dawn danin, pipe puak hi GAWSS Phase-I Tlawng lui aṭanga Tuikhuahtlang zém liana tui lak chhohna a ni a; pipe puak darh hian Kapthanga in leh Lalhmingsanga Fanai te in a tichhia a, in chungte a phawk bakah, in chhung bungrua a tichhe nasa niin an sawi.

Lawipu YMA hruaitute chuan, an veng chu PHE pipe lian kalna a nih avangin pipe puak vangin harsatna a tawk tawh ṭhin tih an sawi a; pipe puakin in a tihchhiatte chu PHE lamin a siamṭhatna senso an chawi ngei an phût dawn tih sawiin, "In siamna senso an tum dawn tih an intiam phawt loh chuan pipe pawh hi siamṭha tura khawih kan phal bik lo ang," an ti.