Kum 2022-2024 chhungin jail táng zinga mi 56 an tlân chhuak, 25 man leh tawh

Home minister K Sapdanga chuan, kum 2022 aṭanga kumin 2024 thlengin jail táng zinga mi 56 an tlân chhuah thu leh, tlân chhuak zinga mi 25-te chu man leh tawh an nih thu August 20, 2024 khan a tarlang.

August 20-21, 2024 chhunga Legislative Assembly session-a Aizawl West-III bialtu ZPM member VL Zaithanzama zawhna a chhànnaah Home Minister chuan, kum 2022, 2023 leh kumin 2024-ah August 16 thlengin jail táng tlan chhuak mi 56 an awm thu a tarlang a ni.

Home Minister tarlan danin, táng tlan chhuak mi 56 zinga 33 chu jail chhung aṭanga tlan chhuak an ni a; damdawi-in aṭanga tlan chhuak mi pariat, court-a hruai an nih laia (court aṭanga) tlan chhuak mi pasarih, police lirthei aṭanga tlan chhuak mi pasarih leh prison ambulance aṭanga tlan chhuak mi pakhat an awm.

Kum hnih chuang hret chhunga táng tlan chhuak mi 56 zinga 17 chu kum 2022-a tlan chhuak an ni a, kum 2023-ah mi 29 tlan chhuakin, kumin 2024-ah mi 10 an tlan chhuak tawh.

Kum 2022 chhunga jail aṭanga tlan chhuak mi 17 zinga pariat chu Central Jail aṭanga tlan chhuak an ni a, Aizawl District Jail leh Champhai District Jail aṭangin mi pathum ve ve, Lunglei District Jail aṭangin mi pahnih leh, Siaha District Jail aṭangin mi pakhat an tlan chhuak.

Kum 2023 chhungin jail táng tlan chhuak mi 29 an awm a, chu'ng zinga mi 10 chu Central Jail-a tángte niin, mi 10 zinga pathum chu Central Women Jail-a tángte an ni. Lunglei District Jail aṭangin mi paruk, Siaha Jail aṭangin mi panga, Champhai Jail leh Serchhip Jail aṭangin mi pathum ve ve, Kolasib Jail leh Lawngtlai Jail aṭangin mi pakhat ve ve an tlân chhuak bawk.

Kumin 2024-ah August 16 thlengin jail táng tlan chhuak mi 10 an awm tawh a; an zinga mi pasarih chu Central Jail aṭanga tlan chhuak niin, pahnih chu Serchhip Jail leh pakhat chu Kolasib Jail aṭanga tlan chhuak an ni.

Kum 2022-2024 chhunga táng tlan chhuak mi 56 zinga mi 25 chu Central Jail aṭanga tlan chhuak an ni a; Central Jail aṭang hian kum 2022 khan mi pariat, kum 2023-ah mi 10 leh kumin 2024-ah mi pasarih an tlân chhuak. Kum 2023-a tlan chhuak mi 10 zinga pathum chu Central Women Jail aṭanga tlan chhuak an ni bawk.

Jail táng tlan chhuak mi 56 zinga mi 25 chu man leh tawh an ni. Man leh tawh zinga pakhat, Rabul Uddin Laskar erawh chu a tlan chhuah vawi khatna (kum 2023)-ah man leh ni mah se, a tlan chhuah vawi hnihna (2024)-ah erawh tun thlengin man a la ni lo.

Home Minister chuan, Mizorama jail-te thawm ṭhat tum a nih leh nih loh zawhna chhángin, "Central Jail, Aizawl bakah district jail hrang hrang pasarihte thawm ṭhat tura hmalak mek a ni," a ti a; August 13, 2024 dinhmun angin Mizorama jail hrang hrangah táng mi 1,807 an awm mek tih a tarlang bawk.