OMB hmangin sum pûk leh a ni

Mizoram sorkar chuan Open Market Borrowing (OMB) hmangin loan cheng vbc. 90 a pûk leh a, sorkar kum kal mek 2024-25 chhunga a pûk ṭum lina niin, kum kal mekah hian OMB hmangin cheng nuai 451 a pûk tawh.

Vanglaini thu dawn danin, Mizoram sorkarin OMB hmanga sum a pûkna tura tih tur ṭulte chu Reserve Bank of India (RBI)-in an buaipui a; OMB hmanga Mizoram sorkarin sum pûk tur a zawn thu August 16, 2024 khan RBI-in a tichhuak.

Mizoram sorkarin OMB hmanga sum a pûk theih nan RBI chuan sum pûktir thei tur zawngin, financial institution-te'n an chháng ṭhin a; Mizoram sorkar sum pûk tur chu RBI chuan August 20, 2024 khan a tifel.

Mizoram sorkar chuan May 2024 tàwp lam khan kumin sorkar kum kal meka a ṭum khatna atan OMB hmangin cheng vbc. 200 a lo pûk tawh a; June thlaah cheng vbc. 71 pûk lehin, July-ah cheng vbc. 90 a pûk leh a, a ṭum lina atan August-ah a pûk leh a ni.

OMB hmanga sum pûk chu kum khatah a pung vawi hnih rulh tur a ni a, kum 10-15 vel chhungin sum pûk zawng zawng rulh tlâk a ngai a, a punna chu 7-8% vel a ni.

Sorkar sum kum kal mekah Mizoram sorkarin OMB hmanga sum a pûk tur zat ruahman chu cheng vbc. 1,170 a ni a; sorkar kum liam ta 2023-24 aiin cheng vbc. 30-in a tlem zawk a, 2023-24 khan cheng vbc. 1,200 pûk tura ruahman a ni.

Financial year 2024-25 budget pharh zawhah chief minister Lalduhoma, Finance enkawltu chuan, kum 2024-25 ah chuan kum 2023-24 aia tlem zawk pûk tura an dah thu a sawi rualin, pûk tur zat ruahman chu pûk ngei ngei tur tihna a nih loh thu a sawi.