Bawlhhlawh leh leivûng dan loa paihtu mi 13 hrem

Aizawl Municipal Corporation (AMC) chuan Aizawl khawpui fai leh thianghlimna turin Mizoram Municipalities Act 2007 leh AMC Solid Waste Management Bye-Laws 2019 hmangin August 19-23, 2024 chhung khan dan loa bawlhhlawh leh leivûng paihtu mi 13 an hrem.

AMC tarlan danin, AMC staff-te chu Aizawl khawpuiah AMC dan bawhchhiat a awm leh awm loh enfiahin an kal kual a; August 19-23 chhung khan tui luankawra bawlhhlawh paihtu mi 12 leh phal lohna hmuna leivûng paihtu mi pakhat chu pawisa an chawitir a ni.

AMC hotute chuan septic tank enkawl ṭha lo leh soakpit tel loa septic tank hmangtu mi 24 chu a nih dan tur ang taka siam ṭha turin an hriattir a; mi dang tana rimchhia leh hnawksaka vawk vulh chhungkaw pakhat chu hun tiam chhunga an vawk tiral tura hriattirna lehkha an pe a, tuichhe luanna fel lo chhungkaw pali pawh an tuichhe luanna siam ṭha nghal tura hriattir an ni bawk.

AMC chuan, Central Pollution Control Board thuchhuah leh Plastic Waste Management Rules, 2016-te bawhzuiin AMC Plastic Waste Management Bye-Laws 2019 an siam a; dan hnuaiah hian hman khat daih plastic tirêm turin hma a la mek tih tarlangin, August 19-23 chhung khan hman khat daih sarâng kg. 72 an man tih an tarlang.