Aizawlah Hleilenna Dona Ni hmang

Mizoram Seventh Day Adventist (SDA) hnuaia Womens Ministries chuan August 24, Inrinni khan Millennium Centre kawtah hleilenna tirêm tura inzirtir tharna ni, Abuse Prevention Emphasis Day an hmang a, Women & Child Development minister Lalrinpuii'n a hmanpui.

Minister Lalrinpuii chuan, ram hrang hrangah indona leh tharum thawhna a thleng a, hleilenna chi hrang hrang a thlen mek thu sawiin, "Thihna thlen lem lo, mahni in chhung, hnathawhna hmun leh zirna-inah hlei­lenna a thleng reng a ni," a ti.

Mizoramah pawh, a bikin hmei­chhiate zingah an hnathawhnaa an hotute aṭanga hlei­lennna tâwk an awm fo nia sawiin Lalrinpuii chuan, "Tharum thawh hi a Kristian lo a, Pathian thu nen a inmil lo. Bible-in mihring taksa chu Pathian in kan ni tih a sawi a, mahni intihthianghlim a ṭul ang bawkin mi dang thinlung leh taksa pawh kan zah a, kan ngaihhlutsak a ṭul," a ti a; Mizoramah The Protection of Children from Sexual Offences (POCSO) Act bawh­chhiatna a tam tawh thu a sawi.

WCD Minister chuan, ruih theih thil chu tharum thawhna leh hleilenna thlentirtu pakhat a nih thu a sawi a, "Ruihhlo kan tihrêm phawt chuan heng thil hi eng emaw chen a ziaawm phah ngei dawn a ni," a ti.

Abuse Prevention Emphasis Day hmannaah hian Women & Child Development district programme officer (ICDS) Dr Lalhruaitluangi Chhangte-in naupang leh hmeichhiate chunga tharum thawh leh hleilenna laka dan awm te, ṭanpui ngaiten an pan tur leh hmalak theih dan a sawi.

Adventist Hospital, Aizawla medical director Dr Eileen Lalrinpuii leh Mizoram State Council for Child Welfare member C Luri ten thu an sawi bawk a; zaithiamte an zai bakah, hleilenna tih bo a ṭul thuin kal khawmte an au rual a ni.