DMR Minister-in lei chêtna hmun a tlawh

Disaster Management & Rehabilitation minister K Sapdanga chuan a bial Aizawl North-III chhung Hunthar Venga lei tlakhniamna hmunte August 24, Inrinni khan a tlawh a; harsatna chinfel dan tur khawtlang hruaitute leh sorkar official-te a sawipui.

Lei chê avangin Hunthar Veng M/S leh P/S-te chu August 26, 2024 aṭangin khar a nih dawn thu Hunthar Veng khawtlang hruaitute'n an lo puang tawh a ni.

Hunthar Veng Local Council leh tlawmngai pawlte'n Hunthar Veng Middle School bula lei chê vanga thuchhuah an siam chungchangah K Sapdanga chuan, "Ṭhahnemngaihna vanga thuchhuah an siam hi an demawm loh," a ti a; chutihrual chuan, sorkar hmalakna kal mek a nih avang leh fûr ruahtui tlak lai a nih avangin hna duh anga thawh theih a ni lo tih hria a, sorkar ngaichâng thiam hram turin a ngen.

DMR Minister chuan, Hunthar Veng M/S-a harsatna thleng chu ruahtui a tlak tam em avang leh a thlang lam aṭanga lei che vang a nih thu sawiin, "A pawi ka ti hle. Sapnela huan tia kan hriata chawpchilh taka sum awm leh awm lo dap chawpa lei kan siam pawh dinhmun derthâwng takah a ding a, tunah hian lei a chhiat mai lohna turin khawchhe karah hna thawh mek a ni," a ti a, theihtawp an chhuah zel dawn thu a sawi.

DMR Minister hi Aizawl SP, Traffic SP leh PWD engineer-te'n an ṭawiawm a ni.

Hunthar Veng M/S bula lei chê chungchangah hian Hunthar Veng LC leh NGO-te chuan August 23, 2024 khan thuchhuah siamin, "He lai hmun, inthlanna atan pawha hman ngam lohna hmunah hian Hunthar khawtlang chuan naupang sikul kaltir ngamna chi-ah a ngai lo a, naupang tan a him loh avangin August 26, 2024 aṭang hian Hunthar M/S leh Hunthar P/S hi tiamchin awm loa khâr a ni ang," an ti.

Hunthar Veng khawtlang hruaitute chuan, an veng M/S leh a vel min chuan inkal pawhna kawng (Sapnela huan) chu lirthei kal theih lohin a siam a, chhungkaw 100 a nghawng mek niin an tarlang a, "M/S tual hi 70% a min tawh a, classroom pakhat phei chu min mai thei dinhmunah a siam bawk," a ti a; inthlannaah polling station atan hman ṭhin ni mah se, him loa ngaih a nih avangin AMC Ward-VI by-election-ah pawh YMA Hall-ah vote thlak a nih thu an tarlang.