Kut hnathawktute hriat tur tichhuak

26th August, 2024

Bangladesh hmar lama thlivir (cyclone) insiam avangin August 27, 2024 thlengin Mizoram chhim lam - Lunglei, Lawngtlai, Siaha, Mamit leh Serchhip district-ahte ruah a sûr nasa tura ngaih a nih avangin sorkarin kut hnathawktute hriat tur a tichhuak.

AgroMet Field Unit (AMFU), ICAR, Mizoram Center leh Directorate of Agriculture, Meteorological Centre (Aizawl) leh District Agro-met Unit (DAMU), KVK, Lengpui te chuan August 23, 2024 khan kut hnathawktute’n harsatna an tawh loh nan leh an lo inhmakhua lawk nan special bulletin an tichhuak a; "Khawchhiat laia sangha chaw pek tam hian dil chhunga oxygen a tlem phah ṭhin a, chuvangin pek vak loh tur," an ti.

KUT HNATHAWKTUTE HRIAT TUR

◆ Khaw chhiat laiin leiṭha pek leh hlo kahte tih loh tur.

◆ August 24-27 inkar hian ruah a sur tam hmel avangin ruahsurin thlai rah leh thei rahte a den chhiat loh nan lên (net) hmangin emaw, a theih chuan khuh a ṭha.

◆ Leiletah tui a tam lutuk chuan luan chhuahtir tur a ni a, hmun zawla thlai chingte pawhin thlai hmuna tui a tlin loh nan tui luanna tur siam tur.

◆ Tuiin lei a chîm hian thlai zung ṭawih a awm duh a, thlai an thih phah ṭhin.

◆ Thei leh thlai rahte an huh hian a rit duh a, a zár an uai nat avangin a zárte a kûrin a tliak duh a, a zárte do ṭhat tur.

◆ Tlang ram buhte a vuì ṭan tawh a, ruahsur nasain a tihtluk loh nan mahni remchan danin lo inhmakhua tur a ni.

◆ Ruah a la sûr nual hmel avangin ruahtuiin lei hànna a kal ralpui lutuk loh nan buhpawl emaw, hnim emawin lei khuh tur.

◆ Lei khuh hian thlai tlu tur leh a zung lang turte a veng.

◆ Khua a chhiat hian thlaiah bacterial wilt natna a awm duh.

◆ Bacterial wilt natna a awm a nih chuan tui litre khatah streptocycline gram 0.6 pawlhin khaw ṭhat laiin kah tur.

◆ Sangha dila tuihâwk a luh hian chirhdiak leh bawlhhlawhte a ken tel ṭhin avangin a luan luh lohna turin a bul velah tui luanna tur ṭha tak siam tur.

◆ Sangha dil a khah loh nan a luan chhuahna tur siam tur a ni a, a luan chhuahna turah sangha an chhuah loh nan lên hmanga khuh tur.

◆ Khawchhiat laia leiṭha pek vak leh sangha chaw pek tam hian dil chhunga oxygen a tlem phah ṭhin a, chuvangin pek vak loh tur a ni.