NH-06 kawngpui a tlahniam chak

National Highway-06 kawngpui, tun hma aṭanga Hunthar Venga tlahniam ṭhin chu tun hnaiah a tlahniam leh a, a tlakhniam nasat zual­na hmunah phei chuan nimin thleng khan kawngpui zâwl pang­ngai aṭanga ft. 4/5 velin a tlahniam tawh. Lei tlak­hniamna lai hi August 24, Inrinni khan DMR Minister-in a enfiah.

Vanglaini palai zawhna chhangin PWD hotute chuan, kum dangah chuan lei tlahniam laite chu kawngpui zàwla an hnawh chuan hun eng emaw chen a daih ṭhin tih an sawi a; kuminah erawh chuan ruahtui a tam avangin chawlhkar khat vel liam ta aṭang khan a tlakhniam zual thu te, zan khat thil thuah kawngpui zâwla an hnawhnate a tlakhniam nghal deuh zel thu leh, hnathawh a hautak thute an sawi.

Hunthar Venga lei tlahniam hian NH-06 kawngpui chhak lama tun hmaa lei tlakhniam ṭhinna lam a khawih che tel lo nia thu dawn a ni.

NH-06 kawngpui tlahniam hi Disaster Management & Rehabi-litation minister K Sapdanga chuan August 24, 2024 khan tlawhin a enfiah a; PWD hotu te, Aizawl SP leh Traffic SP-te'n an ṭawiawm.

DMR Minister chuan, Hunthar Venga NH-06 kawng tlahniam siamṭha tura hnathawh mek chu chak zawka thawh ni se a duh thu sawiin, PWD-in ruahmanna an siamte ṭha tâwk hlea a hriat thu leh lawmawm a tih thu a sawi a; kawng tlahniam vanga traffic jam nasa ṭhin chu vil uluk deuh turin traffic police-te a chah.

Hunthar Venga kawng­pui tlahniam ṭhin chu a vei thu sawiin K Sapdanga chuan, "Sum tam tham deuh a ngaih dawn avangin hmalak zung zung a harsa a, kumin chhung ngeia he lai hmunah hian hmalak ngei tuma ruahmanna siam a ni a, DPR pawh peih a ni tawh," a ti.