KHAWTHLIR

Gas pipline sawipui

Chief minister Lalduhoma chuan August 23, 2024 tlaiah khan a pisaah Indradhanush Gas Grid Ltd. chief executive officer Ajit Kumar Thakur a kâwm a, gas pipe phûm hna thawh mek a sawipui. Indradhanush Gas Grid hian Tripura aṭangin Aizawl pawh turin gas pipeline an phûm mek a, Aizawlah gas pipeline connection kalpui turin an ruahman a ni.

Vote chhiar dawn

August 22, 2024-a AMC Ward-VI by-election neiha vote tlate chu vawiin hian Aizawl DC complex-ah chhiar a ni dawn. He inthlanah hian candidate pathum - Chawnghmingthanga (BJP), H Lalremtluanga (ZPM) leh Lalrinfeli (independent)-te an awm a ni.

Kawng hawng

Minister Lalthansanga chuan August 24, Inrinni khan a bial Aizawl East-I chhunga Falkland Vengah Vengpui Road a hawng. Kawng hi Scheme for Financial Asis­tance to States for Capital Investment (SASCI) aṭanga hmuh Rs 4,80,000 leh khawtlang thawh khawm Rs 4 77,600 hmanga siam a ni.

Nu pakhat thiin hmu

Nimin chawhma dar 10:30 vel khan Ṭhahleiiangi (54), Champhai Vengthar chu an in bula dawr chhungah thia hmuh a ni a, a taksaah chema zaina/sahna hnuhma a awm. Thu dawn danin, Ṭhahleiiangi hi a fate nena khawsa a ni a, a tualthih chungchangah hian Champhai Police Station-ah thubuai ziah luh a ni.

MGYA-in ṭanpui

Mizoram Gorkha Youth Association Ṭhuampui Branch chuan August 24, Inrinni khan an pawl din champha pualin Samaritan Riangvai Rûn, Seling hnenah ṭanpuina - buhfai ip 15, artui bawm hnih, alu ip hnih, dailuah ip hnih, têl báwm nga, pawisa leh thil dangte an pe a ni.

Luiah mitthi hmu

August 24, Inrinni tlai dar 5 vel khan Vailuiah mipa ruang hmuh a ni a, YMA Maubawk Branch-te'n an la chhuak. Thu dawn danin, thia hmuh hi mipa kum 30-40 inkar vel a nih rin a ni a, Nursery veng mi pathum chakai khawrh tumte'n an hmu a, Maubawk YMA hriattirin, Maubawk mi tlawmngaite'n zan dar 9:50 khan an la chhuak.