Ruihhlo donaa hmalak dan tur sawiho

Lunglei District NCORD Committee huaihawtin August 23, Zirtawpni khan Lunglei DC conference hall-ah Lunglei khawpuia damdawi dawr neite tan ruihhlo donaa mawhphurhnate inhrilhfiahna leh ruihhlo donaa hmalakho dan tur sawihona buatsaih a ni a; Lunglei khawpuia damdawi dawrte'n CCTV an vuah ṭha tih tarlan a ni.

Ṭhutkhawmah hian Lunglei khawpuia pharmacist/general drug licence neite an tel a; Lunglei additional DC James Miahlung chuan, ruihhlo hman khawloh venna pakhat atan damdawi dawr leh maxicab counter-ahte CCTV vuah vek tura hriattirna chhuah a nih tawh thu leh thuneitute aṭangin endik a nih thu a sawi a; Lunglei khawpuia damdawi dawr (pharmacy)-te'n CCTV vuah tura thupek an zâwm ṭha niin a sawi.

Sawihonaa hian DC office, Food & Drug Administration, Excise & Narcotics leh Police hotute'n ruihhlo hman khawloh venna leh ruihhlo hluar zel tur venna tura damdawi dawrte mawhphurhna hrang hrang leh ruihhlo donaa hmalakho dan tur sawiho a ni. Damdawi zuarte'n an damdawi kawl leh hralhte an chhinchhiahna register felfai taka vawn dan tur inzirtir bawk.

SAWIHONAA TARLANTE

▶ Damdawi ruih theih hralhah fimkhur a ṭul.

▶ Kum tling lo hnenah damdawi ruih theih pek chhuah loh tur.

▶ Damdawi dawra CCTV vuah vek tur tih chu ṭha taka zawm a pawimawh.

▶ Schedule H drug prescription register vawn dik a ṭul.

▶ Damdawi dawrte'n an zawrh theih loh chin damdawi kawl loh tur.

▶ Dan loa thil tite thlithlai a, thuneitute hnena thlen ṭhin tur.