Kuminah vawk 29,980 thi/suat tawh

Vawk pùl hri, African Swine Fever (ASF) vangin kumin 2024-ah nimin thleng khan Mizorama khua/veng 213-ah vawk thi leh suat 29,980 a tling tawh a; nimin bikah khan khua/veng 25-ah vawk thi leh suat 106 a awm.

AH&Vety department tarlan danin, kuminah January 1 aṭanga nimin thleng khan Mizorama khua/veng 213-ah vawk hri a lêng tawh a; hri leng vangin vawk 10,850 a thi tawh a, vawk 19,130 suat a ni tawh bawk a, a vaiin vawk 29,980 a ni.

Nimin bikah khan Aizawl, Lunglei, Serchhip leh Hnahthial district-a khua/veng 11-ah ASF vangin vawk 42 a thi a, he'ng district pali vêka khua/veng 14-ah vawk 64 suat a ni bawk.

Assembly session neih zawh takah August 20 khan AH&Vety Minister chuan sorkar kum thum kal ta, 2021-22, 2022-23, 2023-24 chhungin Mizoramah ASF kaihhnawiha vawk thi 47,351 leh suat 25,182 a awm thu a tarlang. Kum thum chhunga vawk thi leh suat hi belhkhawm 72,533 a nih thu leh an hlut zawng chu cheng vbc. 560.23 hûa chhût a nih thu a tarlang bawk.