Larsap thusawia lawmthu sawina pawm NLUP a hlawhtling pumhlum lo: CM Hawla

Assembly session ṭan nía Governor thusawia lawmthu sawina, Motion of Thanks chu nimin khan Assembly House-ah sawiho a ni a, pawm a ni. Sawihona khaikhawmtu, chief minister Lal Thanhawla chuan, NLUP chu 100%-in a hlawhtling lo tih an pawm thu a sawi.

Chief Minister chuan, NLUP chu a sawi chhe duh tan sawichhiatna tur a awm tih sawiin, "NLUP hmang dik lo an tam. Mahse, miretheite'n leirem an rah theihna atana NLUP aia policy ṭha a awm em aw? Sawiselna awm mahse ṭha kan ti. Sorkar programme 100%-in a hlawhtling ngai lo a, India ramah chuan 35%-40% a hlawhtlin chuan ṭha an ti ṭhin," a ti.
Chhiah tihpun chungchangah Lal Thanhawla chuan, "Chhiah pung kan tih hian state dang leh ram dangte kan en ve a ngai. Ram tan thawh tur kan nei ve a ni tih kan inhriat a ṭul. A lo sang viau a nih pawhin kan pawm a ṭha," a ti a; chhiah chungchangah tihsan ngai a awm a nih chuan ennawn mai tur a nih thu a sawi.
CM Lal Thanhawla chuan West Bengal-ah ram a dil anga pek a nih thu sawiin, "A thlawna min pek ni mah se, 'Ka ta' a ni ka tih theihna atana senso chu cheng nuai 22 vel a ni. Hralh leh dawn pawh ni ila, sokarah 15% chhûn luh a ngai," a ti.
House chhunga member-te awm dan fakin Chief Minister chuan, "State dangah chuan thu sawi theih mang lohin member-te an bengchheng ṭhin. Mizoram Assembly House-ah chuan ṭhahnemngaihna awkáin thu kan sawi a, ṭawngkam uchuak hman pawh a awm lo," a ti a; member-te chu thil dik lo a awm a nih chuan inhrilhtawn zel turin a sáwm.
Opposition group leader Vanlalzawma chuan, NLUP chu a theory-ah mawi mahse practical-ah a fuh chiah loa a hriat thu sawiin, "A tìr aṭangin sang taka a hlawhtlin ka beisei lo. A dawngtu leh a enkawltu department-te dinhmun bakah, vanduaina vanga tihhlawhtling thei lo an awm thei a ni," a ti a; NLUP chu a dawngtu 50%-60%-in hlawhtlinpui se chuan ramin a ṭhatpui a rin thu a sawi.
Vanlalzawma chuan, chhiah tihpun chu âwm a tih thu a sawi a, "Chhiah tihpun hrim hrim hi kan sawisel lo, a pung tam thut hi a mak. Buhfai man pawh tlema han tihpun deuh chu state dang buhfai man chhûtin a âwm. Tun dinhmunah chuan chhiah hi pek duh lo lam ni loin, tlin ngang loh vanga inthlahrung tak chunga pe thei lo an tam a ni," a ti.
Motion of Thanks pu luttu INC member Vanlalawmpuii Chawngthu chuan, Congress sorkar chu hmeichhiate chawikanna sorkar tih theih a nih thu sawiin, "The Mizo Marriage and Divorce Act, 2014 pass a nih avangin hmeichhiate kan lawm tak zet. AMC bakah V/C leh L/C-a hmeichhiate tana reservation siam a ni pawh hi kan lawm tak zet a ni," a ti a; Mizo hmeichhe fel leh ṭha tak tak an rawn din chhuah dawn thu a sawi.