KHAWTHLIR

Ran entirna
AH&Vety department chuan March 17, 2015 khan Aibawk leh Sateek khuaah rante hriselna a thlawna enfiahna, free animal treatment & vaccination camp an buatsaih a, vety doctor pariat leh thawktu dang 27 an kal. Bawng lian chi 56-te serum sample lak a ni a, FMD vaccination 75 pek niin, bawng 32-ah endik. Vawk 124, ui 35 leh ar 695-te an en bawk.

In pasarih kâng
March 17, 2015 chaw­hma dár 11 vel khan Tlabung aṭanga km. 58-a hlá, Bandiasora-ah chênna in paruk leh private school pakhat chu bungraw chuh hman lohin a kàng ral. Thu dawn danin, kàngmei hi private school aṭanga chhuak a ni a, a bula Brikudar, Sopono Humor, Polim, Dino Ranjan, Sindu leh Bangalu-te in a kang kai a ni. Bandiasora-ah hian in 120 awmin, mihring 450 vel an chêng.

Thawhna him
Labour, Employment & Industrial Training (LE&IT) minister Lalrinmawia Ralte chuan MNF member Lalrinawma zawhna chhangin, Mizoram Youth Commission (MYC)-in Mizoram pawna training tura a tirh, hna thawk tawhte thawhnaah him lo a awm hriat a nih loh thu House a hrilh. Lalrinmawia Ralte sawi danin, MYC tirha Mizoram páwna training chhuak, hna thawk tawhte chu hmeichhia 65 leh mipa 20 an ni.

Tui bill tihpun
PHE minister Zodintluanga chuan MNF member Dr K Beichhua zawhna chhangin, thil man sang zel avangin tui bill chu Rs. 100 aṭangin Rs. 200 (100%)-ah tihpun a nih thu House a hrilh a; tui bill tihpun chu Mizoram Consumers Union hruaitute nen an sawiho hnua thutlukna a nih thu a sawi.

Winery tlawh
Taiwan aṭanga mithiam lo kalte chuan, nimin khan Champhai leh a chhehvela grape chìnna hmun leh Champhai Winery an tlawh a; Champhai Grape Growers' Society member-te nen an inkâwm.