MNYF-in MPSC secretary an chhàl MPSC secretary-in ngaihdam a dil

MNF ṭhalaite chuan nimin khan Mizoram Public Service Commission (MPSC) secretary Tamlal Lohar chu a pisa kái tur an lo tiding a, MPSC chairman tur ruat theih dan a sawi chungchangah darkar 24 chhunga Mizo mipuite hnena ngaihdam dil turin an hrilh. Nimin vek khan Tamlal Lohar chuan thuchhuah siamin, a thu sawiah Mizo mipuite rilru a tiná a nih chuan ngaihdam a dil.

MNYF-te chuan, "MPSC secretary-in MPSC chairman leh secretary atan sorkarin duh duh ruat theih a nih thu a sawi te, duh chuan peon pawh member-ah a dah theih a ti te, mi tupawh member-ah awm se, chu mi chuan kawngro a su thei lo, tia Mizo mipuite tham lo taka a ṭawng khum avangin lehkha a dawn aṭanga darkar 24 chhung ngeia Mizo mipuite hnenah ngaihdam dila thupha cháwi ngei turin kan phût a ni," an ti.

MNYF-te chuan, "Con­stitutional body-a awm MPSC-a thawktu ngeiin hetia ṭawngkam a nei duh leh dâwngdah taka a sawp vel mai mai hi kan thlir liam mai dawn lo," an ti a; MPSC zahawmna vawnhimna atan ke pên zel an tum thu an sawi.

Hetih lai hian Tamlal Lohar chuan, 'MPSC chairman leh mem­ber-te ruat chungchangah sorkarin a duh duh a ruat thei, a duh chuan peon pawh member-ah a dah thei' tia a sawi chu, MPSC chu sorkar hnathawk dang ang lo takin chairman leh member tur hian ram danpuiin qualification emaw, criteria emaw mumal taka bituk a neih loh thu tarlan a tumna a nih thu a sawi.

Tamlal Lohar chuan, "Ka thu­sawi avangin Mizo mipuite rilru ka lo tiná a nih chuan thinlung takin ngaihdam ka dil e. Ka thusawi hi Mizo mipuite rilru tihnat tum­na emaw, MPSC zahawmna tihbawrhban tumna emaw a ni lo tih hi Mizo mipuite'n min hriatsak turin ka duh tak zet a ni," a ti.