Fimkhur loh leh inthlahdah vanga Kângmei tichhuaktute hrem theih

Fire & Emergency Services department chuan kângmei laka invenna leh fimkhur tura ngenna thuchah an siam a; "Fimkhur loh leh inthlahdah vanga kângmei tichhuaktute hi dan hmanga hrem theih an ni," an ti.

Fire & Emergency Services chuan, kum tin ṭhál laiin kangmei chhuak a tam ṭhin a, in leh bungrua, thing leh maute a kan ral bakah, nungcha leh ramsa an thi a, mihring thi pawh an awm phah fo niin an sawi a; kângmei chhuak tam ber chu fimkhur tawk loh vang a nih thu an sawi.

Kângmei chhuah chhan tlang­pui an sawite chu - electric bungrua hman fimkhur tâwk loh vang te, hman dan dik loa hman vang te, chuktuah huan leh lo/leipui hâlnaa fimkhur loh vangte a ni a; fimkhur lo leh inthlahdah vanga kângmei tichhuaktute chu hrem theih an nih thu an tarlang.

Fire & Emergency Services chuan, in kângah ṭhelh theih loh leh ṭhelh hman loha kâng ral ta a awmin mipui aṭanga ṭhahnem­ngaihna awká a ri chhuak ṭhin tih sawiin, "Kan ṭhahnemngaihna awká chhuak hian thu chiang hre hmasa loa Fire Service-te dem mai an chíng ṭhin hi a pawi hle a ni. Fire Service-a thawkte'n an bungraw ang angin theihtawpin an bei tak meuh a, an hnathawh ṭhat ve lam mangnghilha indemna lam thu sawi chin hi thil hriat chian hmasak tâwk loh vang a ni ṭhin," an ti. Mipuite chu thu chiang hre hmasa loa thuthang thehdarh lo turin an ngen.

Fire & Emergency Services tarlan danin, kangṭhelh motor-te hian tanky len dan azirin tui metre 800 aṭanga 3,200 an phur ṭhin a, an tui pump chhuah chak zawng chu minute khatah litre 1100-1250 a ni tlangpui a; a tui phurhte chu minute rei lo te chhungin a phuh zo mai ṭhin a ni.

Thawktu indaih lohna avangin harsatna nasa tak an tâwk tih sawiin, Fire & Emergency Services chuan, "Hetiang hi kan dinhmun a nih avangin mipui lamte kan fimkhur lehzual a pawimawh em em a, indem mai loin mahni in leh lo, ni tina kan chêt velna hrang hrangah kângmei chhuak lo tura fimkhur turin kan inngen a ni," an ti.