MPCC-in Rev. Zosangliana an chhan
Congress party chuan thuchhuah siamin, sorkarin Mizoram Public Service Commission (MPSC) member tura Presbyterian Kohhrana minister thawk lai, Rev. Zosangliana Colney a sâwm vanga sawiselnate an chháng a, "Tun hma chanchinte kan hriat tam loh vang niin a lang," an ti.
MPCC chuan, tun hmain sorkar leh kohhrante inngeih takin an thawkho ṭhin tih sawiin, kum 1948-a Mizoramah Politics Advisory Council din a nihin, member atan pastor ṭang lai pahnih - Chalrang pastor Pasena leh Mizo pastor hmasa ber Chhuahkhama te thlan tlin an nih thu an sawi.
MPCC chuan, Lungleia Sub-District Council Court enkawl turin Baptist pastor ṭang lai Rev. Challiana leh Aizawl Sub-District Council Court enkawl turin Baptist pastor Rev. Khuangliana ruat an nih thu an sawi a; Mizo District Council-ah vêk revenue officer atan Presbyterian Kohhran pastor Rev. Siamhnuna ruat a nih thu sawiin, "Kum 1969 khan pastor ṭang lai Rev. Zairema'n MP a lo chuh tawh bawk," an ti.
Sorkar ṭha taka a kal theihna tur a nih chuan kohhran hruaitute sorkarah an inrawlh hreh lo nia sawiin, Congress party chuan, "Mi ṭhenkhatin kohhran hruaitute sorkar hnaa an inrawlh hi thil tih ngai loh nia an sawi hi thil hriat chian loh vang niin a lang... Sorkar thil tih apiang sawisel tuma hma la an awm ṭhin hi pawi kan ti tak zet a ni," an ti a ni.
Hetih lai hian, Congress party ṭhalaite chuan thuchhuah siamin, Assembly session neih mek ṭan nia Larsap Dr Aziz Qureshi-in thu a sawinaah Congress sorkar hmalakna hmasawnna point 42 a sawi chhuak tih an tarlang a; Congress sorkar chuan hmasawnna lian tham tam tham tak a hnutchhiah nia sawiin, chhuanawm an tih thu an sawi.