Synod-in eirûkna do turin a ngen: Hlemhletnaa hminghliaute rawngbawlnaa hmang lo turin tualchhung kohhrante chah

Mizoram Presbyterian Kohhran hmunpui chuan eirukna do chungchanga hma la tura ngenna tualchhung kohhran hrang hrangte hnenah an thawn a; hlemhletnaa hminghliaute chu a theih chen chenah rawngbawlnaa hmang lo turin kohhrante an chah.

Kum 2022-a Synod Inkhawmpuiah khan presbytery eng emaw zat aṭangin eirûkna leh hlemhletna do rawtna a lut a, Inkhawmpui chuan pawmin, Synod Executive Committee (SEC) bawhzui turin a dah a ni.

Mizoram Synod-in an hnuaia tualchhung kohhrante hnena thawn tur lehkha August 6, 2024-a a tihchhuahah chuan, eirûkna leh hlemhletna do dan tur chu SEC-in a ruahman tih tarlan a ni a, "SEC chuan eirukna do dan tur ruahmanna siamtu tura a tihte'n rawtna an siam chu a pawm," tia ziah a ni.

Synod tarlan danin, eirukna dona tura hmalak dan tur ruahmanna chungchangah Synod Officers Meeting-in bawhzui dan tur ruahmanna a siam a; sorkara ngenna thlen tur te, KṬP, Kohhran Hmeichhia leh Kohhran Pavalai Pawla hmalak dan tur leh tualchhung kohhran hmalak dan turte ruahman a ni.

Synod OM-in ruahmanna a siamte chu a hlawhtlin theihna atan Mizoram Synod chuan tualchhung kohhran hrang hrangte hnenah ngenna a thawn a, kohhran eng emaw zatin an bawhzui tawh. Tualchhung kohhran ṭhenkhat chuan kohhran inkhawmah an puang a, kohhran ṭhenkhat chuan bawhzui dan tur an ngaihtuah chho mek bawk.

Mizoram Synod chuan Central KṬP, Central Kohhran Hmeichhia leh KPP-te chu corruption dona lam inzirtir uar turin a chah bawk a ni.

Mizorama kohhran lian ber dawttu, Baptist Church of Mizoram (BCM) pawhin May 14, 2024 khan tualchhung kohhran tinah lehkha thawnin, eirukna sum thawhlawma chhûn luh kohhranin a thlâkhlelh loh thu a hriattir a; kohhranah puangzar a, kohhran mipuiah zirtir uar turin tualchhung kohhrante a chah a ni.