Khawtlangin Hunthar P/S & M/S an dang

Hunthar Veng LC leh tlawmngai pawlte chuan Hunthar Middle School leh Primary School zirlaite leh zirtirtute sikul kai tur an dang. Sikul an dan hi tiam chin awm lo a ni.

Hunthar P/S leh M/S zirlaite leh zirtirtute chu nimin zing khan sikul kai turin an kal a, mahse, LC leh NGO-te'n lo dangin, an lo dan chhan an hrilhfiah hnuah an hawtir a ni.

Khawtlang hruaitute chuan, sorkar nen inbiakna a awm hma chu sikul kal an remtih loh thu leh, sorkarin hma an lak dawn thu an tihchian a, hma an lak chuan sikul dan an tihtawp leh dawn thu zirlaite leh zirtirtute an hrilh.

Hunthar Veng LC leh NGO-te chuan August 23, 2024 khan thuchhuah siamin, an veng P/S leh M/S bul chu a min avangin sikul an khâr tur thu an lo puang tawh a, "He lai hmun, inthlanna atan pawha hman ngam lohna hmunah hian Hunthar khawtlang chuan naupang sikul kaltir ngamna chi-ah a ngai lo a, naupang tan a him loh avangin August 26, 2024 aṭang hian Hunthar M/S leh Hunthar P/S hi tiamchin awm loa khâr a ni ang," an ti.

Leiminna hmun hi Disaster Management & Rehabilitation minister K Sapdanga chuan August 24, 2024 khan a tlawh a; sorkar hmalakna kal mek a nih avang leh fûr ruahtui tlak lai a nih avangin hna duh anga thawh theih a ni lo tih hria a, sorkar ngaichâng thiam hram turin a ngen.

DMR Minister chuan kumin chhung ngeia he lai hmunah hian hmalak ngei tuma ruahmanna an siam thu leh DPR pawh peih fel a ni tawh thu a sawi bawk.

Hunthar Veng khawtlang hruaitute chuan, an veng P/S leh M/S leh a vel min chuan inkal pawhna kawng (Sapnela huan) chu lirthei kal theih loha a siam thu leh chhungkaw 100 vel a nghawng mek thu an tarlang a, "M/S tual hi 70% a min tawh a, classroom pakhat phei chu min mai thei dinhmunah a siam bawk," an ti.