LRS Minister-in sorkarin a rawih tur firm-te a kâwm

Land Revenue & Settlement (LRS) minister B Lalchhanzova chuan nimin khan a pisaah land survey leh demarcation chungchanga LRS department-a technical officer leh staff-te indaih lohna avanga Mizoram mipui harsatna tawhte sutkianna tura rawih tur empanelled land survey firm hotute a ko kâwm.

B Lalchhanzova chuan, Mizoramah inthlakthlengna a awm theih nan te, ram mamawh leh ram kaihhnawiha harsatna tam tak chinfel a nih theih nante leh sorkara hnathawktu surveyor indaih lohna avanga mipui harsatna tawhte sutkian zel tum a nih thu a sawi a; survey firm-te chu duhsakna a hlan.

Sorkar mit tlung taka an hna thawk tur leh land survey kalpui tur te, mipui harsatna hrethiama zaidam leh hawihhâwm taka dan hnuaia hna thawk turin Minister chuan a chah nghal bawk.

Land survey firm-te hi orientation training pek an ni phawt dawn a, training paltlangte hnenah danin a tuk angin land survey licence pek a ni ang. LRS department hriatpuina leh phalna hnuaiah land survey firm leh mipuite'n awlsam zawka ram survey leh demarcation an kalpui theihna turte ruahman a ni.

Mizoram sorkar chuan land survey firm 16 a thlang a, empanelled survey firm-te chuan a taka hna thawk thei turin sorkar nen deed of agreement an ziak tawh a ni.