Eptu party lian ṭang dunin party naupang tê an beih rawn hi thil thar a ni lo - Dr Kenneth

ZPM party chuan nimin khan an pisaah chhung inkhawm an nei a; State Planning Board vice chairman Dr Kenneth Chawngliana'n thu sawiin, eptu party lian ṭang dunin party naupang tê an beih rawn chu thil thar ni loin, thil thleng fo tawh a nih thu a sawi.

Dr Kenneth Chawngliana chuan, eptu party lian ṭang dunin party naupang ber an beih rawn ta hi thil thar a ni lo a, tun hma politics-a thil lo thleng fo tawh a nih thu sawiin, “Party pahnih an thawh dun reng rengin pakhat zawk an ral fo ṭhin," a ti.

Kalphung thara hmalak mek laiin hun eng emaw chen chu mipuite chhel taka an awm a ngaih thu sawiin Kenneth Chawngliana chuan, "Eptu party lamin kalphung hlui, Aigupta sa bêl mipui hnenah an lo tawktarh bâng lo a, nimahsela, damlo damna turin damdawi khâ kan inbarh a ngai ṭhin. Chu damdawi chuan hna a thawh hunah chuan damloin damna a chang dawn a ni," a ti a; kalphung hlui leh kalphung thar inthlak mek te, zirtirtu transfer leh sorkar hmalakna dangte chu mipuiin an hrethiam a, an thlâwp ta hle niin a sawi.

Dr Kenneth Chawngliana chuan, ṭhenawm state-te ûm pha turin nasa taka ṭan lak a ngaih thu a sawi a, "Ṭan lakna tur kan ngah hle a, sorkar leh mipui kan ṭanrual a ngai a ni," a ti.

Inkhawmah hian ZPM vice president W Chhuanawma, MLA-in AMC Ward-VI by-election neih taka ZPM candidate H Lalremtluanga thlan tlin a nih avanga lawmthu sawina hun a hmang. 

H Lalremtluanga pawhin thu sawiin, “Pathian leh mipuite zarah thlan tlin ka ni hi ka lawm hle a, theihtawpa min ṭawngṭaisaktu leh party worker-te thawhrimnaah lawmthu ka sawi a ni," a ti a; Pathian hruainain Ward-VI hmasawnna turin theihtawp a chhuah dawn thu a sawi.