DC-in leimin vanga kawng chhia enfiah

Mamit district bawrhsap Jacob Lalawmpuia chuan nimin khan tun hnaia ruahsur vanga Mamit leh Dárlâk kawng, Tuidai thlanga leiminna hmun te, Mamit leh Dapchhuah inkar kawngte a hmunah a enfiah.

Jacob Lalawmpuia chuan, kumin fûrah ruahtui a tam avangin chhiatna nasa zawk a thlen loh nan a theih ang anga invenna kalpui tum a nih thu a sawi a, "Leimin vanga inkalpawhna kawngpui min tel mai thei dinhmuna kan din avangin kawng hlui, Mausen kawng lam chu eng emaw thut a awm pawha kal theih/zawh theih tura then fai a ni dawn," a ti.

Mamit-Darlak inkar kawnga leimin vanga harsatna thleng mek chu PWD-te'n a theih ang anga hna an thawh mek thu te, fûr ruahtui tam vanga Mamit-Dapchhuah inkar kawng chhe ṭhin chungchangah hmalak zel dan tur ngaihtuah a nih tur thu te, Darlak-Tuidam inkar kawng pawh a theih ang anga thawm ṭhat a ni chungin awmzia a neih hleih theih rih lo thu te, kawng thara leimin chu lirthei kal theih tura ruahman mek a nih thute a sawi bawk.

Mamit Bawrhsap hi PWD (National Highway) hotu te, sorkar official dangte leh thuthar thehdarhtute'n an ṭawiawm a ni.