ZPM-in sorkar hmalakna an chhuang

ZPM party chuan, August 22, 2024 khan Mizo hmeichhia, Syria rama hna thawka awm mi pathum, harsatna tawkte chu Mizoram sorkar hmalaknain Mizoramah him taka hruai haw an nih thu sawiin, Mizoram sorkar hmalakna chhuanawm an tih thu an tarlang.

ZPM chuan thuchhuah siamin, "Mizo hmeichhe pathumte hian an hnathawhna Syria ramah harsatna an tâwk a ni tih sorkarin a hriat veleh a rang thei ang bera hma la turin Chief Minister-in Mizoram police thuneitute a hriattir nghal a, Mizorama hruai haw an nih theihna turin May thla aṭang khan sorkarin theihtawp a lo chhuah tawh a ni," an ti.

ZPM tarlan danin, hmeichhe pathumte'n Mizoramah haw an duh a ni tih sorkarin a hriat veleh Syria rama Indian Embassy biak a ni a, Mizorama lâk lêt an nih thlengin Mizoram sorkarin Police leh CID-te hmangin a be pawp reng a, Mizoram sorkar hmalakna hmangin Mizoramah hruai haw an ni.

Chief minister Lalduhoma kaihhruainain June 11, 2024 khan 'Mizo Diaspora Cell' din a nih thu tarlangin ZPM chuan, "Committee hi Mizoram khua leh tui, state dang leh ram pawna chengte dinhmun ngaihven a, an harsatna emaw, mamawh an neih emaw phuhru tura hmalak chu an hna ber a ni," an ti. "Ram pawna Mizo awm harsatna tâwkte ngaihtuahtu sorkar kan nei hi a thlamuanthlâk kan ti a, Mizo nulate lâk lêt an nih theihna tura ngaihtuahna sênga tha thawhtu CM, Home Minister leh sorkar official-te chhuanawm kan ti tak zet a ni," an ti bawk.