Pawn lam aṭanga an insawi ang ngawt a ni lo tih an inhre chho mek - MNF MLA

MNF MLA Ramthanmawia chuan ZPM chu thla 8 chhung an sorkar tawh tih sawiin, "Zoram mipuiin an hre ṭan mek a, pawn lam aṭanga an insawi ang ngawt a ni lo tih chu anmahni ngei pawhin an inhre chho mek," a ti.

Ramthanmawia hian nimina MNF chhung inkhawmah thu sawiin, Mizoram Assembly session neih zawh takah Assam Rifles chungchang sawi a nih thu a sawi a, "AR chungchangah CM-in AR leh Mizoram sorkarin MoU hran ve ve an ziak angin a sawi a. RTI chhanna erawh AR-in MoU an duang a, Mizoram sorkarin a lo endik tih a ni," a ti a, CM-in a thusawi a dik zawk a tih chu RTI zahawmna tihbawrhbânna niin a sawi.

Minister-te chu inzir peih loah puhin Ramthanmawia chuan, "Anmahni flagship programme chungchang zawh belhna pawh an chhang hlei thei lo," a ti a; Chief Minister chu thu dik tâwk lo pawh thu dik anga sawi hmiah hmiah ṭhinah a puh bawk.

MNF general secretary Dr L Thangmawia pawhin thu sawiin, ZPM sorkar ang em ema insawifiah nasa sorkar a awm a la hre ngai lo tih a sawi a, "An sorkar tirh khan CM-in minister-te department enkawl dan tur road map kan nei vek a, kan policy duan tawhsa angin an kal ang, a ti a. Amaherawhchu, tun thlengin mipuiin an road map kan la hmu lo. An sawi loh ang zelin an kal," a ti.

Dr L Thangmawia chuan, Mizoram inthlanpui result zirchianna aṭanga tehin MNF chu mipuiin an hnâwl lo niin a sawi a, "Inthlan hnuhnung berah bial 13-ah chuan voter tharte nen kan vote hmuh percent a pung a, bial 22-ah MNF candidate-te'n inthlan hmasa aia sang zawk vote an hmu," a ti. MNF chu insiamṭhat an ngai tih sawiin, "Ruling kan nih laiin a malsawmnaah kan lo tlu sual a ni thei. Pu Laldenga ten Mizoram hmakhua tur vision an neihte tihlawhtling turin ZPM chêtsual châng loin, keimahni ngei hian theihtawp kan chhuah a ṭul," a ti bawk.