Minister-in UNNATI scheme a tlangzarh

Commerce & Industries minister F Rodingliana chuan nimin khan Aijal Club-ah 'Uttar Poorva Transformative Industrialization Scheme (UNNATI) 2024' chu Mizoram tan a tlangzarh a, UNNATI inhrilhfiahna hun hman nghal a ni.

F Rodingliana chuan, industry hmasawnna tur sorkar laipui scheme chu Mizoram sorkarin Hand Holding Policy a kalpui mek leh tun hnaia Strategic Investment Plan hnuaia MSME Elevate Mizoram (MEMiz) scheme leh hmalakna dangte nen a remchan dan ang zela zàr zawm tum a nih thu a sawi a, "Industry neitute tan hmasawnna ṭha tak a thlen ka beisei," a ti.

Tun hmain Mizorama industry neitute zingah an eizawnna bul ṭan leh tihhmasawnna tur loan an pûkte a nih dan tura hmang lo leh loan rùl ṭha lo an awm ṭhin thu sawiin Minister chuan, "Industry ṭhanna tur an tiṭhuanawp. Tun hnuah chuan hlawhtlin tak tak duhte tan sorkar chuan theihtawp a chhuah dawn," a ti a; chìn ṭha lote chíng ve lo turin ṭhalai kal khawmte a chah.

UNNATI hi India hmarchhak state-a industry hmanga economy hmasawnna chak zawk a thlen theihna tura hmalakna a ni a, tlangzarh inkhawm hi Commerce & Industries director Maria CT Zuali'n a kaihruai.

UNNATI inhrilhfiahnaah hian health care (hospital/diagnostic centre, etc.), food & beverage (horticulture, agriculture, food entrepreneur, etc.), tourism (hotel/homestay) leh education (LESDE/ vocational & digital/IT & ITES)-te mithiamte'n an sawifiah a ni.