JB College ruby jubilee lawmna khar

J Buana College chuan nimin khan an college multipurpose hall-ah an college kum 40-na, ruby jubilee lawmna an khâr a, Lunglei West bialtu MLA T Lalhlimpuia'n khârna inkhawm a hmanpui.

T Lalhlimpuia chuan, Mizoramah politics ṭha leh sorkar inrêlbàwlna ṭha a awm theih nan mahni phak tâwka an tih theih an ngaihtuah a, thâ an thawh ṭheuh a pawimawh thu a sawi a; thiamna leh eizawnnaa inelna sang tak hmachhawn ngam a, hlawhtling tura theihtawp chhuaha bei turin zirlaite a fuih.

J Buana College hi kum 1983-ah din a ni a, October 2007-ah sorkar college-ah hlan kai a ni. Arts leh commerce zirna niin, English, Mizo, History, Geography, Economics, Education, Political Science, Public Administration leh Commerce subject-ahte core lak theih a ni a, zirlai 377 an awm mek.

Ruby jubilee hi August 26, 2023 khan lawm ṭan niin, nimin khan khâr a ni a; jubilee an lawm chhungin festival open air concert, blood donation camp, thing phun leh, Lunglei khawpuia zirna in hrang hrangah outreach programme-te an buatsaih.