Aizawl district-ah vawk lak luh khap

Aizawl district magis-trate Lalhriatpuia chuan thupek chhuahin, Aizawl district-ah district páwn lam aṭanga vawk, vawksa leh vawksa aṭanga siam ei tur chi reng reng lak luh khap a nih thu a puang.

Bawrhsap chuan, July 22, 2024-a African Swine Fever chungchanga khuahkhirhna thupek chhuah tawh chu tihdanglam hret a nih thu a tarlang a; thupek zâwm lote leh vawk damlo leh thi chungchang Vety department-a hriattir lote lakah action lak a nih dawn thu a tarlang.

Aizawl DC chuan, vawk damlo talh leh hralh khap tlat a nih thu te, vawk damlo chu dah hran vat tur a nih thu te, vawk thi reng reng bawlhhlawh paihna hmun leh lui kawr remchangah paih khap a ni a, ft. 4 tala thûkah chinai kg. hnih vel tal phula phûm tur a nih thu te, vawk thi awmna vawk-in leh a velte tihthianghlim (disinfect) vek tur a nih thute a tarlang a, "Vawk damlo leh thi an awmin AH&Vety department hotute hriattir vat tur a ni. Ti lo an awm a nih chuan action lak a ni ang," a ti.

Aizawl district chhunga khua leh khua leh, veng leh veng emawa vawk inlak tawn tur reng rengah vawk hrisel ṭha chauh lak tur a nih thu te, vawk hri lênna hmun (ASF infected area) aṭangin vawk lak khap a nih thu te, district chhung bika vawk lak luh reng reng Disaster Management Act hnuaia ruat bialtu zonal officer-te hriattir hmasak tur a nih thute a tarlang bawk.