NH thlûr li chungchangah sorkar puh

BJP Mizoram Pradesh chuan nimin khan an pisaah political session an nei a; an president Vanlalhmuaka'n thu sawiin, Vairengte aṭanga NH kawngpui thlûr lia sial tur tun thlenga siam a la nih loh chhan chu Mizoram sorkarin a tih tur a tihfel loh vang niin a sawi.

Vanlalhmuaka chuan, NH thlur lia sial tur chu sorkar laipui hmalakna, sum awm sa a nih thu a sawi a, "Vawiin thlenga kawng ṭha kan neih theih loh chhan chu state sorkar hian kawng siamna tur atan a tih tur a tihfel loh vang a ni. Sorkar hian ram hmasawnna aia ngaih pawimawh dang an nei ṭhin a, compensation buaiin kan buai luih luih a, vawiin thlenga Vairengte-Aizawl inkar kawng chhiat vangin kan buai phah a ni," a ti.

Mizoram BJP President chuan, Aizawl khawpui tâwt leh traffic jam nasa tihziaawmna tur Aizawl By-Pass Road siamna tur central-in cheng vbc. 500 a rawn pe tih sawiin, "Vawiin thleng hian hnathawh theih a la ni lo hi a buaithlak hle. Mimal anga hlâwkna kan têl ve theih dawn loh chuan kan tikhawtlai duh ṭhin niin a lang," a ti a; mipuiin thil tak tak an ngaihtuah a ngaih thu a sawi.

PM scheme hrang hrangte chu state sorkarin Hand Holding Policy-ah kaih luh an tum nia sawiin Vanlalhmuaka chuan, a lawmawm rualin, PM scheme a nih ang taka kalpui a, mahni party hamṭhatna atana hman tum lo tura a duh thu a sawi bawk.