KHAWTHLIR

ZPM an lawm

ZPM party chuan thuchhuah siamin, Aizawl Municipal Corporation (AMC) Ward-VI by-election-ah an party candidate H Lalremtluanga thlan tlin a nih chu lawmawm an tih thu an tarlang. "ZPM party chunga rinna nghat a, corporator atana ZPM candidate thlang tlingtu Ward-VI mipui chungah thinlung takin lawmthu kan sawi," an ti.

Thlan tlin lawmpui

MPCC & MNF Joint Campaign Committee chuan thuchhuah siamin, AMC Ward-VI by-election-a thlan tlin H Lalremtluanga, ZPM candidate an lawmpui thu an tarlang a, "Aizawl khawpui leh Ward-VI hmasawnna hna tluang tak leh ṭha taka thawk tur leh ward hmasawnna tura an intiamnate ti­hlawhtling ngei turin duh­sakna kan hlan," an ti.

FPO sawiho

Champhaiah District Monitoring Committee for Central Sector Scheme Formation and Promotion of 10,000 Farmer Producer Organisations chu nimin khan an chairman VL Remliana, bawrhsap hoin an ṭhukhawm. FPO-te'n fertilizer leh pesticide license an neih theih dan tur te, Open Network for Digital Commerce-a an inziah luh dan tur te, GST leh FSSAI registration an neih theih dan turte sawiho a ni.

Financial & Digital Literacy Camp

Mizoram Rural Bank, Hnahthial Branch chuan nimin khan an branch manager Thelma M Zokimi kaihhruaiin Hnahthial DC conferencce hall-ah Financial & Digital Literacy Camp an buatsaih a, additional DC Zothanmawia Khiangte hoin DC pisaa officer leh thawktute an tel. Loan lak dan, loan pung awm dan leh MRB-a account neite tana hamṭhatna awm theite zirho a ni.

Minister-in kâwm

Minister of state Lalnghinglova Hmar chuan nimin khan North Eastern Council (NEC) planning adviser Som Kamei, financial adviser Thanglemlian leh economic adviser Sherry Lalthangzo te an pisa ṭheuhah a kâwm a; Sports & Youth Services leh LESDE department-a thawhhona awm theite a sawipui.