Card vara awm turte thlang mek: A thlangtu tur zinga YMA telh Central YMA-in a hriatpui lo

Food Civil Supplies & Consumer Affairs (FCSCA)-in Non Food Securtity Act (NFSA) Selection Committee a dinte chuan Aizawl khawpuiah ration card vara awm turte an thlang mek. Hetihlai hian NFSA Selection Committee-a YMA telh Central YMA chuan an hriatpui lo niin an tarlang.

Card vara awm turte thlanna hi a bul ṭanna atan Aizawl khawpuiah kalpui phawt a ni a, a thlangtu atan veng tinah NFSA Selection Committee din a ni. Selection Committee hian NFSA hnuaia buhfai man tláwma dawng (card eng leh card pawl) zingah card vara awm tur zawk an awm em tih an zawng chhuak dawn a ni.

Aizawl khawpuiah hian September thla laihawl velah chuan card vara awm tur thlan chhuah hna zawh hman beisei a ni a, chumi hnuah thingtlang lamah hmalak ve leh a ni ang.

NFSA Selection Committee hian an thlan chhuahte chu sorkara an thehluh hmain khawtlang mipui hmuh theih turin an tár chhuak ang a, sawisel duh neite tan sawisel theih a ni ang. Sawiselna awmte chinfel a nih hnuah final list târ chhuah tum a ni.

NFSA Selection Committee-ah hian secretary atan YMA branch president ṭheuhte ruat a ni a; YMA aiawh inruat chungchangah hian Central YMA chuan YMA branch-te hnenah lehkha thawnin, YMA aiawh inruat chungchang chu CYMA-in a hriatpui lo tih an tarlang.

CYMA chuan, "Tun hnaiah Mizoram sorkar hnuaia FCSCA department-in khaw tina NFSA Selection Committee secretary atan YMA branch tina president ruatna a tihchhuah hi CYMA chuan a hriatpui lo," an ti.

NFSA SELECTION COMMITTEE DIN DAN

Chairman - Ditrict Civil Supply Officer

Vice Chairman - LC/VC Chairman

Secretary - YMA Branch President

Assistant Secretary - LC/VC Secretary

Member - 

1. LC/VC members

2. Sub Village Committee

3. MUP President

4. MHIP President

Ex-officio - Centre Incharge