Kuhva rah man sa bothlau ip 3,828 - 3,928 inkar a awm

Home minister K Sapdanga chuan Assembly session neih zawh takah MNF member H Lalzirliana zawhna ziaka chhangin, kuhva rah man sa zingah kim lo (bothlau) ip 3,828 - 3,928 inkar a awm thu a tarlang.

Home Minister tarlan danin, kuhva rah man sa bothlau tamna ber chu Mamit district-ah niin, ip 2,198 a bo/kim lo a; Aizawl district-ah ip 1,615 - 1,715 vel a kim lo a, Kolasib district-ah ip 15 a kim lo bawk.

Mamit district-a kuhva man sa bona kudamte chu - Kanhmun kudam aṭangin ip 1,753 leh Luimawi kudam aṭangin ip 445 a ni a; Kolasib district-ah Vairengte Hall Venga Jenny Lalnunmawii kudam aṭangin ip 15 a bo. Aizawl district-ah chuan Sairang Dinthar kudam aṭangin ip 1,400 - 1,500 vel leh Muanna Veng kudam aṭangin ip 215 a bo a ni.

Kuhva tawlh chung­chang chu Mizoram sorkarin CBI a chhuitir dawn leh dawn loh H Lalzirliana zawhna chhangin Home Minister chuan, "Gauhati High Court Aizawl Bench order dated 16.7.2024-in PIL no. 5/2022 (Vanramchhuangi vs UoI & ors) chuan kuhva rah tawlh chungchang hi CBI chhui turin a ti tawh a. Vigilance department aṭanga thu dawn danin, CBI chhui hun tur chung­changah hian thutlukna siam a awm lo a ni," a ti.