ZPM sorkar hnuah speaker bangla atan cheng nuai 23.40 sên a ni - MNF

MNF party chuan thuchhuah siamin, ZPM kaihhruai sorkar a pian hnuah Assembly Speaker bangla atan cheng nuai 23.40 sên a ni tawh tih an tarlang.

Speaker bangla atana senso zat chu RTI Act tlawhchhanin zawh a ni tih sawiin MNF chuan, "RTI Act hmanga zawhna PWD Building Division-in an chhanna aṭanga a lan danin, ZPM sorkar hnuah speaker bangla chei ṭhatna leh bungraw lei nan cheng nuai 23.40 sen a ni. Bangla cheina atan cheng nuai 8.40 leh bungrua (sofa, dining table, doormat, etc.) lei nan nuai 15 an sêng," an ti.

MNF chuan, chief minister Lalduhoma'n sorkarna an chan hlima thuthar lakhawmtute a kawmnaah bangla chei nan sum hman vak vak ṭha a tih loh thu leh chutiang tih ve an tum loh thu a sawi tih tarlangin, "Chutiang a nih laia Speaker-in a bangla atan cheng nuai 23.40 a sêng hi a intuhâ lo hle," an ti a; minister leh MLA dangte quarters pawh chei ṭhat a ni hlawm tih an tarlang.

ZPM chu an insawi loh ang hlira awm an ni tih tlang hriat a ni tawh nia sawiin MNF chuan, "Mipui pawhin ngaiah kan nei tawh. Chutih laiin sum renchem leh sorkar insawhngheh kumah an puang mek. Anmahni ber a bawhchhetuah an ṭang zel mai hi a pawi hle," an ti.

MNF party chuan, sum indaih lohna avangin Mizoram puma kawng chhe em emte siam a nih loh laiin, sorkarin vaibelchhe telin sum a pûk reng tih tarlangin, "Chutih laia bangla cheibâwlna tura sum tam tak a luang hi a uiawm hle," an ti a; ZPM sorkara thuneitute chuan dâwt sawi leh an intiamna bawhchhiat an hreh lo a nih pawhin chhetê tala mipui zah ve turin an phût a ni.