Kawngpui chhiat chhan chu sorkar inthlahdah vang - MPCC

Mizoram Pradesh Cong-ress Committee (MPCC) chuan thuchhuah siamin, Mizoram hmun hrang hranga kawngpui chhiat chhan chu sorkar inthlahdah vang niin an tarlang.

MPCC chuan, chief minister Lalduhoma'n ZPM a sorkar chuan kawng tlo lo a tlo nghal vek dawn tiin vawi tam tak campaign-naah a sawi ṭhin niin an tarlang a, "Party dangte'n sorkarna an chan laiin a bik takin Aizawl khawpui chhunga kan kawngpuite hi a chhe ngai lo. Aizawl khawpui chhungah rai puar leh damlo, emergency-a phurh ngam an ni tawh lote hi sorkar inthlahdah vang liau liau a ni," a ti.

ZPM an sorkar hnuah ṭhál laiin inbuatsaihna hun zau tak a awm nia sawiin MPCC chuan, "Chuti chunga kawngpui thawm ṭhat hna an thawk duh lo leh a thawm ṭhat ṭhenkhat pawh a beitham lutuk hi mak kan ti hle," an ti a; PWD Minister an dem tak zet tih an tarlang.

Congress party chuan, Mizoram hmun hrang hrangah kawng chhe lutuk avangin mipuite'n châk laknaah harsat nasa tak an tâwk mek nia sawiin, "Mizoram ei leh bàr châwk luhna ber Silchar-Aizawl kawng pawh bungrua phur motor-te an rawn kal duh tawh lo ang tih hlauhawm khawpin a chhe hle," an ti a; khaw tam takah maxi cab-te kawng a chhiat vanga lirthei an tlân duh lo leh sikul naupangte'n kawng an zawh hial chu sorkar mualphona a nih thu an sawi.

Kawng chhiate a rang thei ang bera siam a nih theih nan hma la nghal tura PWD Minister phûtin MPCC chuan, "Chhuanlam tur zawng ringawt a, insawifiah reng ringawt loin, hna tak tak thawk ṭan tawh turin kan duh," an ti.