Hmeichhiate humhimna leh chawikanna atana hmalakna Lungleiah an sawiho

Hmeichhiate humhimna leh chawikanna atana hmalakna, Mission Shakti hnuaia Lunglei District Implementing Committee chu an chairman R Lalṭhazuala, district bawrhsap hoin nimin khan DC conference hall-ah ṭhukhawm a, hmalak tawhna leh hmachhawpte an sawiho.

Mission Shakti hi hmeichhiate humhimna leh chawikanna (safety, security & empowerment of women) atana hmalakna a ni a, 15th Finance Commission hun chhung kum 2021-22 aṭanga kum 2025-26 chhunga kalpui tura duan a ni. A hnuaiah péng (sub-scheme) pahnih - SAMBAL (safety & security) leh SAMARTHYA (empowerment) a awm.

SAMBAL hnuaiah hian hmeichhia, nu leh a fa te, hleilenna tuarte enkawl a, an mamawhna zawna ṭanpui tura din One Stop Centre (ni 5 leh zan 5 awm theihna) te, harsatna leh hleilenna tuar hmeichhiate'n engtik lai pawha an biak theih Universal Women Helpline (WHL) toll free no. 181 te, nau piang zat, chanvo leh dinhmuna mipa leh hmeichhe inthlauhna nasa lutuk tireh tura hmalakna Beti Bachao Beti Padhao (BBBP)-te kalpui a ni.

SAMARTHYA hnuaiah hmeichhe baihvaite tluk luhna tur kum 3-5 awm theihna Shakti Sadan (Integrated Relief and Rehabilitation Home) te, Palna (Anganwadi-cum-Creche Centre) te, hmeichhia khualkhuaa hna thawk leh lehkha zira awmte senso tlem zawka an awm theihna tur Sakhi Niwas (Working Women Hostel) te, nu fa tir pai/pawmte'n Rs 5,000 leh fa pahnihnaa hmeichhe hringte'n Rs 6,000 an dawn theihna Pradhan Mantri Matru Vandana Yojana (PMMVY)-te kalpui a ni.

Lunglei district-ah chuan Serkawnah One Stop Centre siam a ni a; Bazar Vengah Shakti Sadan leh MHIP Sub-Headquarters enkawlin Chanmari-ah Sakhi Niwas a awm bawk.