Hnahthial dist-a kawng chhia sawiho

Hnahthial district bawrhsap Rita Lalnun-mawii Pachuau kaih-hruaiin nimin khan DC meeting hall-ah sorkar hotu te, NHIDCL, ABCI, Mathiyan, YMA Sub-Headquarters, Tuipui D, Rotlang East leh Leite khawtlang hruaitute'n Hnahthial district-a National Highway-54 kawng chhia chungchang an sawiho.

Bawrhsap chuan, Hnahthial district-a NH chungchanga hmalakna hrang hrangah thawhhona ṭha neih a ṭul thu a sawi a, "NHIDCL a ni emaw, ABCI leh Mathiyan pawh ni se, hmanrua leh thil dangah harsatna an neih chuan inpuih tlan a ṭul," a ti.

Kawng a chhiat hlimah a chhak lam ram neitute tan zangnadawmna a awm theih leh theih loh Lunglei CALA biak a ni a, CALA-in chhanna an pek loh avangin kawng chhak ko laih theih a la nih rih loh thu DC chuan a sawi. NHIDCL, ABCI leh Mathiyan-te chu an insawi anga an awm loh a, hotu lian zawk lama thlen a ṭul a nih pawhin a hma an lak zel tur thu a sawi bawk.

Ṭhutkhawmah hian, 'ABCI lamin tuna kawng pangngai hi uluk takin lirthei tlân theih reng turin an enkawl ang a, hetih lai hian by-pass laitu Mathiyan pawhin an kawng enkawl hi a ṭha thei ang berin an enkawl ang' an ti.

Hnahthiala truck neitute'n by-pass kawng chhuah dawna lirthei táng ṭhin an sawi chungchangah kawng enkawltu Mathiyan aiawhte chuan ni thum chhung hun pe a, ngai-chang turin an ngen a; leiminna lai by-pass kawnga gabion wall siam ngai pawh ni thum chhunga thawh ṭan theih an inrin thu an sawi bawk.