Drug license 37 cancel a ni tawh - Health Minister

Heath & Family Welfare minister Lalrinpuii chuan, Health Minister a nih aṭangin drug license recommendation a la pek loh thu leh drug license 37 tihtawp (cancel) a nih tawh thu a sawi.

HFW Minister hian Aizawl district Nasha Mukt Bharat Abhiyaan (NMBA)-in nimina School Education conference hall-a 'NMBA orientation programme for master volunteers and nodal teachers on drug abuse prevention' an buatsaih a hmanpuinaah thu sawiin, "Drug license min dil an tam em em a, tu mah recommendation ka ziahsak duh lo. Mobile license pawh Central YMA-in min ngen angin tihtawp dan ngaihtuahin kan thlithlai reng a, hmân deuh lawk khan drug license 37 kan cancel tawh," a ti.

Master volunteer tura thlante chu ruihhlo laka an ṭhalaipuite leh an naute veng tura chahin Lalrinpuii chuan, "Middle school naupangte aṭangin ruihhlo ti an awm ṭan tawh. In naute hi veng u la, social media a chak tawh avangin eng nge an tih ṭhin tih enzui ṭhin ang che u," a ti a; ruihhlo laka Mizoram chhan chhuak turin an pawimawh thu a sawi.

Health Minister chuan, ruihhlo donaah ṭan rual a pawimawh thu sawiin, "Engtiangin nge kan ram hi ruihhlo lakah kan chhanhim ang a, thâ kan thawh ve ang tih rilru ngaihtuah pui bera kan hman a, extra effort kan pek chuan kan ram hi kan chhan chhuak thei ang," a ti.

HFW Minister chuan, kohhran leh YMA-te nen ruihhlo tirêm tura theih­tawp chhuaha hma an lak mek thu leh hlawhtlin hun a la awm ngei a beisei thu a sawi a; damdawi zuarte chu an license-in a phal bak damdawi zuar lo turin a chah.

Aizawl district-ah ruihhlo laka zirlaite vennaa hma la tur bik nodal officer atan Aizawla college 10 aṭangin zirtirtu 10 leh master volunteer atan college 10 aṭang hian zirlai 50 thlan an ni a; Mizorama district 11-ah zirlai 50 leh zirtirtu 10 ṭheuh thlan a ni bawk.

Nodal officer leh mas­ter volunteer-te chuan tleirawlte ruihhlo ti lo turin an zirtir dawn a, ṭanpui ngai an nih chuan ṭan­puina hmun kawh­hmuh leh hruai thlen te, a ṭul anga sawihopui bakah, ruih­­hlo laka an fihlim theih nan hma an la dawn a ni.

Aizawl district-a college 10-ah hian NMBA hnuaiah anti-drug club (rál vengtu) din a ni tawh a; anti-drug club-te'n a ṭula an hman atan Aizawl district NMBA chuan Rs 10,000 ṭheuh a pe a, nimina zirhonaah hian HFW Minister-in nodal teacher-te hnenah a hlan.

Nimina zirhona hi Aizawl District NMBA chairman Lalhriatpuia, bawrhsapin a kaihruai a; Mizoram Social Defence and Rehabilitation Board chief executive officer Lalhlupuii Sailo-in NMBA-a Mizoram sorkar hmalakna leh hmachhawpte a sawifiah a, District NMBA secretary Lalramthianghlima pawh­in thu a sawi bawk.

Chawhnuah orien­tation training neih a ni a; MSDRB aiawhin Lalfakawmi leh Lalrindika bakah, Aizawl College associate professor Dr Lalremruati ten master volunteer-te leh nodal teacher-te tih tur leh hma­lakna turte an hrilhfiah a ni.