KHAWTHLIR

Hand Holding zirho

ZPM General Head­quarters chuan ZPM organiser-te leh deputy chief organiser-te pualin nimin khan Venghlui YMA Hall-ah Hand Holding Policy zirhona an buatsaih. Adviser to CM (Hand Holding) Dr KC Lalmalsawmzauva, Marketing Board co-chairman-in Hand Holding Policy a hrilhfiah a; zawhna leh chhanna hun hman a ni.

Ṭanpuina hlan

Chief Minister staff quarters thlanga tun hnaia leimin vanga chhiatna tâwk Dawrpui Vengthara chhungkaw pakua hnenah nimin khan Chief Minister's Relief Fund aṭangin ṭanpuina Rs 10,000 ṭheuh pek a ni a, vawk thi pakhat zelah Rs 5,000 ṭheuh pek a ni bawk. Ṭanpuina hi Chief Minister aiawhin a private secretary Lalrinawma Khiangte-in Dawrpui Vengthar Local Council chairman Robert Zosangliana hnenah a hlan.

Silk dyeing training

Sericulture department leh Research Extension Centre, Central Silk Board, Aizawl chuan nimin khan Zemabawka Sericulture Training Institute-ah 'Silk Dyeing Training' an buatsaih ṭan a, district pakua aṭangin mi 21 an tel. Training-ah hian mithiamte'n silk pangang khawi chungchanga hriat tur pawimawhte an sawifiah a; training hi vawiinah chhunzawm tur niin, naktukah zawh a ni ang.

Tablet 101 sem

Samagra Shiksha hnuaiah nimin khan Khawzawl district-a sorkar primary school leh middle school 49-a zirtirtute hnenah zirlai an zirtirna atana hman tur tablet 101 sem a ni a, district bawrhsap K Vanlalṭhiana'n a telpui. Bawrhsap chuan, "Zirlaite an dinchhuah theihna tur thiamna leh finna pe thei turin zirtirtute'n theihtawp chhuah ang che u," a ti.

Kuhva phurh khap

Lawngtlai bawrhsap Cheemala Siva Gopal Reddy leh Saitual bawrhsap Dr Lalngura Tlaute chuan thupek chhuahin, an district chhungah dan loa kuhva rah lak luh, phurh leh dah khawl khap a nih thu an puang. Lawngtlai DC chuan, dan loa kuhva rah tawlh rûk phurtute hnen aṭangin danin a phût ang ni loa pawisa lak khap a nih thu a tarlang bawk.