Covid-19 vei chhuahtir aṭangin Mi 17-in hripui an kái chhâwng?

Nimina sorkar thuchhuakin a tarlan danin, September 5-a hripui vei hmuh chhuah zinga Mizoram chhunga kái chhâwng nia hriat mi paruk an awm a. An zinga pahnih chu Thingsulthliah khaw mi construction company-a thawk mipa pahnih, kum 46 mi ve ve an ni. Hei bakah hian medical staff pathum, kum 26-51 inkar, mipa pakhat leh hmeichhia pahnih an tel a; pakhat dang chu Chanmari West Local Task Force member mipa kum 24 mi niin, a kaina hriat a ni lo.

Sorkar thuchhuakah, Thiang­sul Tlangnuama construction company-a thawk mi pahnihte hi an kaina chhan hriat loh anga tarlan a ni a; chutih laiin, an khua, Thingsul Tlangnuam Village Task Force (VTF) Chairman chuan, September 1, 2020-a CCC, ITI, Aizawl aṭanga Covid-19 positive chhuahtirte hruaitu leh dah lehtu an nih avangin, chuta ṭanga kai ngei nia a lan thu a sawi thung. 

Hei bakah hian Tlangnuam khaw daia company camp-a hnam dang hnathawk riak khawm mi 15-te chu Inrinni khan Covid-19 an kai tih hmuh chhuah a ni a, hei hi Covid-19 positive ni chunga an chhuahtir tak riahna hmun a nih avangin heng mi 15-te pawh hi positive ni chunga chhuahtir aṭanga kai chhawngah an ngai bawk a ni.

Vanglaini palai zawhna chhangin Thingsul Tlangnuam VTF chairman C Zothansanga, YMA president ni bawk chuan, an khaw mi pahnih, Covid-19 veite chu Champhai kawng siamtu company-a thawk an nih thu a sawi a, "Pakhat hi work in-charge a ni a, pakhat hi driver a ni. An pahnih hian ITI aṭanga Covid-19 vei chhuahtir tak zuk hruaitute an ni," a ti.

Task Force Chairman sawi danin, September 1-a Covid-19 la vei (positive) tih hriat chian chunga sorkarin mi pariat a chhuahtir zingah Champhai kawng siamtu company-a thawk mi pakhat a tel ve a; chu mi chu he company-a thawk ve tho an khaw mi leh sa pahnihte'n motor-in an hruai haw a, zan dar 8 velah an khua an thleng.

Mi pariatte chu sorkarin lak let leh vek tur (CCC-ah dah luh leh tur) a tih avangin a tûk September 2-ah Covid-19 positive lo chhuak hi mi pahnihte bawk hian CCC-ah an dah lut leh a; dah luh a nih hma hian Covid-19 vei chu company camp-ah zan khat a riak hman a ni.

C Zothansanga chuan he camp-a hnathawkte hi an swab sample lak a ni a, mi 15 an positive takah chuan September 1-a CCC aṭanga chhuahtir aṭanga inkài chhâwng an nih a rinawm thu a sawi a; VTF-in contact tracing an ti nghal a, chhui zui tur tam lo mah se, mi 10 chuang hret chu swab sample endik ngai a awm dawn thu a sawi bawk.

Inrinnia positive hmuh chhuah zinga medical staff pathum - mipa pakhat leh hmei­chhia pahnihte chu CCC, ITI, Aizawla thawk, Covid-19 veite enkawltu an nih thu dawn a ni.

Health department hotute hnen aṭanga thu dawn danin, CCC, ITI-a Covid-19 veite enkawltu, hripui vei tih hmuh chhuah tâkte chu health worker pahnih (mipa leh hmeichhia) leh, 4th grade pakhat (hmeichhia) an ni.