HIV+ve chin hriat loha awm mi 633-te ART centre pan turin CM-in a ngen

HIV leh mipat hmeichhiatna aṭanga inkai chhâwn natna sexually transmitted infection (STI) chungchang mipui zirtirna beihpui thlakna, Intensified IEC Campaign - India Fight Against HIV & STI chu nimin khan chief minister Lalduhoma'n Vaivakawn YMA Hall-ah a hawng. CM chuan, HIV vei hmuh chhuah tawh, an chin hriat zui loh mi 633 an awm tih sawiin, chu'ng mite chu ART centre pan turin a ngen.

Intensified IEC Campaign - India Fight Against HIV & STI hi National AIDS Control Organisation (NACO)-in India ram state tina kalpui tura a ruahman a ni a, Mizoramah pawh Mizoram khaw tinah kalpui tura ruahman niin, kumin September leh October thla chhung kalpui a ni ang.

CM Lalduhoma chuan, Mizoram State AIDS Control Society (MSACS)-in HIV vei mi 16,217 an enkawl mek tih sawiin, "HIV natna vei hmuh chhuah, an chin hriat zui si loh mi 633 an awm. An chin kan hriat zui loh kan ṭhiante hi kan ngaihtuah hle mai a, an hnaih ber ART centre lo pan ṭheuh turin ka ngen a ni," a ti.

HIV/AIDS leh STI-te chu nunphung vanga awm ve ve a nih thu sawiin Lalduhoma chuan, "HIV hi vanduai vanga kai theih a ni nâin, chutianga kai chu an tam lo. Mizorama kai 60% hi mipat hmeichhiatna condom tel loa hman vanga kai an ni a, a dang 30% hi ruihhlo ti ṭhinte an ni," a ti a; HIV do hneh turin vei tawhte hmuh chhuah zung zung a ngaih thu sawiin, inringhlelte chu rang taka inchian turin a chah.

Chief Minister chuan, HIV veite hriat chhuah hma a nih a, ART damdawi ṭha taka a ei bawk chuan rei tak dam zui theih a nih thu a sawi a, "Nu, HIV kaiin nau a hrin pawhin enkawlna ṭha tak dawng chunga nau a pai chuan a fa a him thei. Nikum chhung pawh khan chutiang nau piang 120 kan neih zinga 118 chu HIV lakah an fihlim a ni," a ti.

NACO chhût danin Mizorama puitling zinga 2.73% chu HIV kai theia ngaih an ni tih sawiin CM Duhoma chuan, "Kan dinhmun a him lo. Kohhran, tlawmngai pawl, pawl leh mimal tin hmalakpuiah ka sâwm a, kan pun khawmnaah i sawi uar ang u. Kohhran leh tlawmngai pawlte tel lo chuan kan ti thei lo tih kan hria a, YMA phei chu kan innghahna a ni," a ti a; ṭan tlan a ngaih thu a sawi.

Chief Minister chuan, HIV veite'n ART damdawi an lak hmaa endikna chi hrang hrang tih ngai - baseline investigation atana pawisa an chawi ngai ṭhin chu a thlâwnin sorkarin a tihsak tawh dawn thu a puang a ni.

CM Lalduhoma chuan, Intensified IEC Campaign-in khaw tina chhungkaw tin a thleng phak ngei theih nan district tina DC leh an thawhpuite chu ṭha taka hma la ngei turin a chah a; HIV vei mek, mi dangin an kai ve hlaua ṭhahnemngai taka thawktu te, HIV vei mekte enkawl ṭhinte inpekna chhuanawm a tih thu a sawi bawk.

Health & Family Welfare minister Lalrinpuii pawhin thu sawiin, ruihhloin Mizoram a rûn nasa tih a sawi a, "Injection zingah middle school zirlaite pawh an awm tih hmuh chhuah a ni. Khuh damdawi pawh hralh a kal viau nia sawi a ni. Kan dinhmun chhiatzia hi hriaa mi tinin kan do a ngai," a ti.

Lalrinpuii chuan, khaw tin leh in tin thleng phak campaign neih an tum thu sawiin, State Council on AIDS tuai thar leh a nih thu leh MLA zawng zawng hman ṭangkai tum a nih thu a sawi a; kohhran leh tlawmngai pawlte nasa zawka thawhpui an tum thu a sawi bawk.

Intensified IEC Campaign - India Fight Against HIV & STI hawnnaah hian Health secretary Sangchhin Chinzah leh MSACS project director Dr Lalthlengliani te pawhin thu an sawi a ni.