Minister-te'n lei tlahniam an enfiah

Disaster Management & Rehabilitation minister K Sapdanga leh PWD minister Vanlalhlana te chuan nimin khan Vaivakawn Zohnuai kawnga lei tlahniam leh a bul hnaia in chim hlauhawma ngaihte an enfiah a; lei tlahniam vanga tui connection khaihlakte tan temporary connection point siam turin an ruahman.

DMR minister K Sapdanga chuan, fûr ruahtui tam vanga Vaivakawn Zohnuai kawnga lei tlahniam leh leimin vanga harsatna thlengte chu pawi a tih thu a sawi a, "Sorkar department mithiamte enpuina hnuaiah ruahmanna siam thuai a ṭul a, hma la tur leh ruahmanna bawhzui tur hian Aizawl DC ruat a ni," a ti.

PWD minister Vanlalhlana chuan, khawtlangah harsatna lian zawk a thlen loh nan in chim mai theia ngaihte chu a rang lama ṭhiah a ṭul thu a sawi.

DMR Minister leh PWD Minister te hi PHE minister Lalnilawma leh deputy govt. chief whip W Chhuanawma ten an ṭawiawm a; a kaihhnawih department hrang hranga hotute leh khawtlang hruaitute nen hmalak dan tur sawiho a ni.

Vaivakawn Zohnuai kawng tlahniam zel tur vên nan tuikawng siam ṭhat a ṭul thu te, lei tlahniam zâwna in chim theia ngaihte ṭhiah a ṭul thu te, lirthei lian leh rit phur tlan khap rih a ṭul thute an sawi lan a ni.