LESDE Minister-in Central hotute a dâwr

Labour, Employment, Skill Development and Entrepreneurship minister Lalnghinglova Hmar chuan nimin khan Delhi Mizoram House-ah National Skill Development Corporation - International (NSDCI) advisor Dr Dnyaneshwar Mulay leh head of international business Sudhanshu Aggarwal te a kâwm a, Mizorama skill training lian tham kalpui dan tur a sawipui.

Lalnghinglova Hmar chuan, sorkar laipui hnuaia skill training project-ah Mizoram nena inmil zawk leh Mizo ṭhalaite thiam zawng job role neih a pawimawh thu NSDCI hotute a hrilh a; Mizoram ṭhalaite tan kut themthiam zirna hmunpui, skill centre lian tham din tura hmalak dan tur a sawipui a ni.

Kut themthiamna lam zirna bakah, zir chhuakte puih theih dan tur sawiho a ni a; ram páwna hna hmute chu an kal dan leh thawh zui dan chungchangah dan ang thlapa kalpui a pawimawh thu sawi a ni. A hma thei angin NSDCI aiawhte nen Aizawlah sawiho leh thuai ni se, an ti.

Sports minister ni bawk Lalnghinglova Hmar hian nimin vek Ministry of Finance hnuaia Department of Economic Affairs hotute a kâwm a; Asian Development Bank hnuaia Mizoram sorkar sports project táng ṭhenkhatte a sawipui a ni.

Minister hi Sports & Youth Services joint secretary John Ṭanpuia leh Mizoram State Sports Council secretary Henry C Lalrawnkima ten an ṭawiawm a ni.