Kawng chhia an aupui hi an hotute siam, fûr khat pawh a daih lo a ni - ZPM party

ZPM party chuan thuchhuah siamin, eptu party-te'n sorkar leh PWD Minister dema kawng chhia an aupui mek chu an hotute'n fûr khat pawh daih loa kawngpui an siam­te a nih thu an tarlang.

Tunlaiin eptu party-te'n kawngpui chhiat avangin sorkar demna an thehdarh nasa tih sawiin ZPM chuan, "An sorkar laia an kawng siam ngei, fûr khat pawh a daih loh avanga sorkar thar dem nana an han hmang leh mai hi mahni mawng hlîmna mai leh sorkar lai beih châk vang hrim hrim niin a lang. Sorkar hmasate hun laiin kawngpui a chhe hle ṭhin a, hmun ṭhenkhatah phei chuan kawng chhia leh tui tlingah buhte an inphunsak hial a ni," an ti.

ZPM chuan, ZPM kaihhruai sorkar, kum khat pawh la tling lo chu eptute'n kum tam tak lo sorkar tawhte tih theih loh ti nghal vek tura ngaiin, mipui hnena beiseina dik lo tuh ṭhinah an puh a, "ZPM sorkar hian hna thawh nan hun a la nei tlem em em a ni," an ti a; MP election Model Code of Conduct-in hun rei tak a phuar vangin hna an thawh chak loh thu an tarlang.

PWD Minister hma­lak­nain kawng chhe siamna tur ruahmanna siam vek a ni tawh nia sawiin ZPM chuan, "Fûr lai a nih avangin hmalak a harsa a, kawngpui chhiate hi la siam theih a ni lo. Fûr a zo ang a, kawng chhe siam hna thawk tura ruahmanna peih vek tawh hi sorkar chuan a taka hmalak thuai a tum a ni," an ti.