KHAWTHLIR
Zirtirtu ṭha
Synod Higher Secondary School lecturer Joseph Vanlalhruaia Sailo chu zirtirtu ṭha chawimawina, National Award to Teachers' 2024 dawng tura thlan a ni a, kumina Teachers Day (September 5) khian New Delhi-ah President-in a hlan ang. Joseph Vanlalhruaia Sailo hian nikum khan President hnen aṭangin National Award for NSS Programme Officer a dawng tawh a, kum 2022 khan State Teachers' Award a lo dawng tawh bawk.
State Election Commissioner ruat
Mizoram sorkar chuan state election commissioner atan Dr H Lalthlangliana, MCS a ruat. SEC ruatna atana hriattirna hi August 27, 2024 khan GAD-in an tichhuak a, thla khatah Rs 2,25,000 (fix) hlawh tura tih a ni. H Lalthlangliana hi Mizoram sorkarah secretary ni lai a ni.
Helmet 130 man
Champhai DC pisa hmalaknain nimin khan DSCO, SDPO, IPR, District Consumer Union hruaitute leh Legal Metrology aiawhte'n Champhai khawpuiah IS 4151:2005 certified tling pha lo helmet zuar an awm leh awm loh an endik a, dawr pali aṭangin helmet him tâwk lo 130 an man. Hmalakna hi sorkar laipuia Department of Consumer Affairs aṭanga hriattirna dawn anga kalpui a ni.
Safai Apnao Bimaari Bhagao
North Vanlaiphai SDO (Civil) Dr Peter Malsawmtluanga hoin nimin khan N Vanlaiphai Presbyterian English School-ah Safai Apnao Bimaari Bhagao (SABB) campaign neih a ni. SDO chuan faina leh hriselna chungchang zirlai naupangte a hrilhfiah a; School Management Board chairman Rev. Jehu Laldintluanga leh zirtirtute'n an hmanpui a ni.
MLA-in fang
Lunglei High Powered Committee (HPC) vice chairman V Malsawmtluanga, MLA chuan August 27-28 chhung khan a bial Lunglei North chhunga Thiltlang, Pangzawl leh Rawpui khuate a tlawh. MLA hian mipuite'n mamawh an thlenna hun (public interview) a buatsaih a, khawtlang hruaitute hnenah tarpauline, volleyball leh football-te a hlan a ni.
Tree plantation drive
Saitual DC Dr Lalngura Tlau chuan nimin khan District Hub for Empowerment of Women & One Stop Centre hmalaknain DC pisa huam chhungah Tree Plantation Drive cum 100 Days Awareness Campaign a hawng. Campaign-ah hian chawlhkar tin thupui hrang hrang hman tur a ni a, tun karah Beti Bachao Beti Padhao leh Tree Plantation Drive kalpui tur a ni. Hawnna inkhawm zawhah DC complex-ah thing phun a ni.
CD ratio bituk khûm
Lunglei leh Kolasib-ah nimin khan District Consultative Committee, District Level Review Committee leh District Level Security Committee an ṭhukhawm a, district bawrhsap ve vein an kaihruai. April-June, 2024 chhunga Lunglei district-a bank-te credit deposit ratio chu 71.66% a nih thu leh Kolasib district-a bank-te CD ratio chu 70.69% a nih thu tarlan a ni. District pahnihte hian CD ratio ṭha tehna atana bituk 60% an khûm.